Монголын үндэсний бөхийн холбооны дэд тэргүүн Ц.Магалжав өнөөдөр /2019.06.25/ допингийн асуудлаар сэтгүүлчдэд мэдээлэл хийлээ. 

Тэрбээр "2017 онд БСШУСЯ, Биеийн тамир спортын газар, Допингийн эсрэг төв хамтран "Допингийн эсрэг үндэсний хяналт 1" төслийг хэрэгжүүлсэн. Энэхүү төслийн хүрээнд 198 тамирчнаас шинжилгээ авсан. Үүний 43 нь үндэсний бөхийн тамирчин байсан. Үндэсний бөхийн холбооны дүрэм журмын дагуу шинжилгээг авахад долоон залуу шинжилгээнд бүдэрсэн асуудал үүсээд байгаа. Энэ шинжилгээг олон улсын дүрэм хууль журам, дотоод шийдвэр, Засгийн газрын тогтоолын дагуу авсан. Энэ бол албан ёсны шинжилгээ. Гэтэл Хүрэлбаатар гуай будлиантай асуудал үүсгээд орхисноос болж шүүхээс энэ залуусыг албадан барилдуулах шийдвэр гаргаж өгсөн.

Энэ асуудлаас болоод сэргээх хэрэглэж, эрхээ хасуулсан таван бөх уучлал хүсч шийтгэлийн хугацааг багасгах хүсэлт гаргасан. Хүсэлтийн дагуу Үндэсний бөхийн холбоо 15 тэргүүлэгчдийнхээ шийдвэрээр тогтоол гаргасан. Энэхүү тогтоолыг төрийн бус байгууллагын зарчмаар явуулсан бөгөөд МҮБХ-ны 15 тэргүүлэгчээс найман хүн уучлал үзүүлж, долоон хүн татгалзсан шийдвэр гаргасан. Олонхоороо асуудлыг шийдэх төрийн бус байгууллагын зарчмын дагуу бөхчүүдэд уучлал үзүүлж цахимаар бүртгэл хийгээд явуулаад байна. Гэтэл Үндэсний бөхийн холбооноос энэ сарын 23-нд зохион байгуулсан Үндэсний их баяр наадмын  сорилго барилдаанд оролцохоор ирсэн бөхчүүд энэ шийдвэрийг асэргүүцэж бөхийн барилдаан эхлэхгүй цаг гаруй хугацаанд саатсан" гэв. 

Сэргээшийн шинжилгээнд бүдэрсэн бөхчүүдийг энэ жилийн Улсын баяр наадмаар зодоглуулах эсэхийг санал асуулгаар шийдэх аж. 

И.Сарангоо