Монгол Улсад анх удаа зохиогдож буй Сагсан бөмбөгийн 3х3 төрлийн 18 хүртэлх насны ДАШТ-ий медальтнууд өнөөдөр тодорлоо. Монголын баг хасагдах шатанд Турк улсын багтай тоглож Туркийн багт 21:18 харьцаагаар ялагдлаа. Тэмцээний дараагаар Монголын багийн тоглогч А.Батхуягтай цөөн хором ярилцлаа.

-Сүүлийн тоглолтын талаарх сэтгэгдлээ хуваалцахгүй юу?

-Сүүлийн тоглолтод Турк улсын багтай тоглосон. Бид маш өрсөлдөөнтэй зооноос гарч ирсэн учраас тайвширчихсан. Өнөөдрийн тоглолтын хувьд бид хийх ёстой зүйлээ дутуу хийсэн гэж дүгнэж байгаа.

-Сандрал байв уу?

-Эхний тоглолтон дээр бага зэрэг сандарсан түүнээс хойш сандраагүй. Сүүлийн тоглолтон дээр  хэтэрхий тайвширчихсан гэж бодож байна.

-Гэхдээ л Тулга дасгалжуулагч та нараар бахархаж байгаа даа?

-Би U18 3x3 улсын аварга шалгаруулах тэмцээнд гурван найзтайгаа орж түрүүлсэн. Тэгээд С.Тулга дасгалжуулагч дуудаад анх багтаа орж байсан юм. Дасгалжуулагч нартаа баярлалаа гэж хэлмээр байна.

-Хамгийн хүчтэй өрсөлдөгч ямар улсын баг  байв?

-Довтолгоон дээр АНУ-ын Dawson Lee Garsia хамгийн хүчтэй өрсөлдөгч байсан.

-Хэзээнээс сагс тоглож эхэлсэн бэ?

-Долоодугаар ангиасаа Д.Эрдэнэбаатар багшийнхаа удирдлаган дор сагсан бөмбөгийн спортоор хичээллэж эхэлсэн. Багшийгаа бурхны оронд одох хүртэл хамтдаа маш их бэлтгэл хийсэн дээ.

-Тэгвэл багш тань сагсан бөмбөгийн спортод “дурлахад” чухал нөлөө үзүүлжээ.

Хамгийн их нөлөөлсөн хүн бол Д.Эрдэнэбаатар багш маань, хоёрдугаарт аав ээж хоёр байгаа. Ээжийг ирж үзэхээр би муу тоглоод байдаг учраас  манай ээж миний тоглолтуудыг ирж үздэггүй. Гэртээ зурагтаар үздэг.

-Ярилцсанд баярлалаа.

Л.Отгонмягмар, С.Ганцэцэг