ХХААХҮЯ-наас махны нийлүүлэлт, үнийн талаар мэдээлэл хийлээ. Энэ үеэр ХХААХҮ-ийн сайд Ч.Улаан өнөөдрөөс махны үнэ тогтворжино гэж хэллээ. Тэрбээр “Хүчит шонхор захад махны нийлүүлэлтийг нэмэгдүүлэх арга хэмжээг авлаа. Өнөөдрөөс махны нийлүүлэлт тодорхой хэмжээгээр нэмэгдэнэ. Ингэснээр махны үнэ тогтворжино. Цаашид дулааны аргаар мах боловсруулах үйлдвэрүүд зах дээрээс махны нийлүүлэлтээ хангахгүй" гэв. 

Салбарын яам болон мэргэжлийн байгууллагууд мах боловсруулах үйлдвэрүүдэд шалгалт хийсэн байна. Тус шалгалтаар дулааны аргаар мах боловсруулах үйлдвэрүүд итгэмжлэгдсэн махны үйлдвэрээс махаа бэлтгэх тухай журмыг зөрчсөн нь илэрчээ. Үйлдвэрүүд шууд зах зээл дээрээс махаа бэлтгэж байгаа нь махны хомсдол үүсч, үнэ хөөргөдөх шалтгаан болж байгааг тогтоосон байна. Тиймээс боловсруулах үйлдвэрүүд зах дээрээс мах бэлтгэхийг хориглож, тодорхой арга хэмжээ авахаар болжээ. 

Цаэашид үйлдвэрийн аргаар бэлтгэсэн мах экспортолж байгаа компаниудад дотоодын зах зээлийн хангамжид тодорхой хэмжээний үүрэг хүлээлгэнэ. Экспортод гаргаж байгаа махныхаа тодорхой хэсгийг  дотоодын зах зээлд нийлүүлсэн нөхцөлд мах экспортлох эрхийг нь баталгаажуулах журам тогтооно. Цаашид энэ онд бэлтгэсэн махнаас 2-3 дахин их аюулгүй нөөц бэлтгэхээр тодорхой зохицуулалтын арга хэмжээ авч байна. 2019 онд 10-12 мянган тонн мах бэлтгэнэ. Нөөцийн махны үнэ цаашид тогтвортой байна” гэсэн мэдээллийг өглөө.

Махны өнөөгийн үнийг 2018 оны мөн үетэй харьцуулахад хонины мах 17 хувь, ямааны мах 28 хувь, үхрийн мах 14 хувь, адууны мах 11 хувиар өссөн байна.

Сүүлийн 10 хоногийн хугацаанд 791 тонн мах нийслэлийн зах зээлд нийлүүлэгджээ.

Б.Болд