Өнгөрсөн долоо хоногт Бээжин хотод зохион байгуулагдсан “Коксжих нүүрсний нөөц ба зах зээл 2019” олон улсын бага хуралд ОХУ-ын нүүрс экспортлогч компаниуд анх удаа төлөөлөгчөөр оролцож, илтгэл тавьжээ.

Тухайлбал, тус улсын өмнөд Якутын бүс нутагт ажилладаг Колмар компанийн удирдлагууд мэдээлэл өгсөн байна. Ингэхдээ Якутын сайн чанарын коксжих нүүрсний олборлолт, баяжуулалтыг эрчтэй нэмэгдүүлж, Ази-Номхон далайн зах зээлийн хамгийн хүчтэй өрсөлдөгч болох төлөвлөгөөтэй байгаа тухайгаа ярьсан байна. Якутын бүс нутагт коксжих ба эрчим хүчний нүүрсний томоохон орд газрууд бий. Зөвхөн Колмар компани л гэхэд 1.2 тэрбум гаруй тонн нөөцтэй ордод ажилладаг бөгөөд сүүлийн 2-3хан жилийн хугацаанд уурхайн дэд бүтэцдээ 70 гаруй тэрбум рублийн хөрөнгө оруулалт хийж, олборлолтоо хэд нугалан нэмэгдүүлжээ.

Kolmar sales and logistics компанийн Гүйцэтгэх захирал Лилей Вернлийн илтгэлд дурдсанаар, тус компани 2020 он гэхэд чулуун нүүрсний экспортоо 20 сая тоннд хүргэж, Азийн, тэр дундаа Хятадын зах зээлийг “онилох” аж. Мөн ОХУ нүүрсний экспортоор Азийн зах зээлд хамгийн гол өрсөлдөгч болох том амбиц төлөвлөгөөтэй байгааг онцолсон байна.

ОХУ газарзүйн байрлалын хувьд Хятадын гол зах зээлээс алс хол хэдий ч боломжоо тултал нь ашиглаж, төмөр зам, дэд бүтэцдээ маш их хөрөнгө хаях замаар нүүрсний экспортоо эрчтэй нэмэгдүүлж байна. Ялангуяа нүүрсний үнэ өсөлттэй байгаа өнөөгийн цаг үеийг ОХУ-ын компаниуд маш сайн ашиглаж байгаа юм.

Б.Болор