1978 оны хөлбөмбөгийн ДАШТ-д түрүүлж байсан Рене Хаусмэн 64 насандаа таалал төгсчээ.Энэ талаар Аргентиний хөлбөмбөгийн холбоо мэдэгдлээ.

Хуракан, Ривер Плэйт, Коко клубүүдэд хүчин зүтгэж байсан тоглогчийн хувьд хэлний хорт хавдартай хэмээн оношлогдоод байсан билээ. Эл Локо, Испаний галзуу хурд, талбайн эзэн гэх мэт хочоороо алдартай байсан хөлбөмбөгчин нь бөмбөг туултын авьяасаараа өөрийнхөө үед гайхагдаж байсан нэгэн юм.

“Маш их уй гашуу амтагдаж байна. Гэхдээ Рене Хаусмэнд баяртай гэх цаг нь одоо болжээ. Баярлалаа Локо. Бидннийг баясгаж байсанд маш их баярлалаа” гэж түүний хүчин зүтгэж байсан Хуракан клуб твиттэр хуудсандаа бичжээ.

Хаусмэн Аргентиний шигшээ багийн бүрэлдэхүүнд 55 тоглолтод оролцож 1974, 1978 оны шигшээ багийн бүрэлдэхүүнд багтаж байсан билээ.Түүнтэй хүчин зүтгэж байсан багийн анд нь “Дахин давтагдашгүй тоглогч. Үнэхээр өвөрмөц. Дэлхий нийтийг гайхшруулсан авьяастан. Бас зоримог, хурдан тамирчиин гэвэл түүнийг нэрлэнэ. Талбайн гадна ч тэр нэг  л зангаараа байж чаддаг жинхэнэ эр хүн. Жинхэнэ дотны анд, итгэлт нөхөр байсан” хэмээжээ.

Б.Энх-Амгалан