Талбайн теннисийн од Рафаэл Надал ташааны булчиндаа авсан гэмтлийн улмаас дараагийн 14 хоног талбайд гарах боломжгүй боллоо. Дэлхийн чансааг тэргүүлэгч Надал Австралийн нээлттэй тэмцээний үеэр уг гэмтлийг авсан байна.

Гэмтэл маш хүнд харагдсан боловч нарийвчилсан шинжилгээгээр тийм ч ноцтой биш гэж хариу гарсан юм. Ямартай ч 2 долоо хоногийн дараа талбайд гарах боломжтой болно. Өөрөөр хэлбэл 2 сарын 26-нд эхлэх АТП-ийн цувралын Акапүлкод тэмцээнд оролцоно гэж мэдэгдэв.

Надалын хэвлэийн төлөөлөгч “Рафа Надал өнөөдөр Мелбурн хотын эмнэлэгт MRI шинжилгээнд орсон. Түүний баруун хөлийн холбоос эд нэгдүгээр зэргийн сэмрэлттэй гэж шинжилгээний хариу гарсан. Удахгүй тэр Испанид очиж халдаргүйжүүлэх эмчилгээнд хамрагдаж, амраад авах болно. Түүний бие бүрэн илааршиж, талбайд дахин теннсис тоглоход 2 долоо хоногийн хугацаа хэрэтэй. Өөрөөр хэлбэл 14 хоногийн дараа бэлтгэлдээ орж болно гэсэн үг. Ер нь бол бүрэн илаарштал 3 долоо хоног болно. Тиймээс төлөвлөгөөт цуврал тэмцээнүүдэд буюу Акапулко, Индиан Уэльс, Маиамин тэмцээнүүдэд бүгдэд нь оролцоно” гэв.

Б.Энх-Амгалан