Манчестер Юнайтед клуб Алексис Санчезийг Арсенал клубээс авч, оронд нь Армен хагас хамгаалагч Хенрих Мхитарян эсрэг чиглэлд багаа солив.

Өдгөө 29 настай Чили довтлогч Санчез 2014 онд Барселона клубээс хойд Лондонд ирснээсээ хойш 166 тоглолтод оролцож 80 гоол оруулжээ. Тэрбээр багийн бүрэлдэхүүнд 2015 болон 2017 онуудад ФА цомын аварга цолыг хүртсэн бөгөөд тус тоглолтуудад хоёуланд нь гоол оруулсан юм.

Санчез “Би дэлхийн хамгийн том клубтэй нэгдэж байгаадаа сэтгэл маш их хөдөлж байна. Баялаг түүхтэй цэнгэлдэхэд тоглож, Жозе Моуриньгийн удирдлага доор тоглоно гэдэг татгалзах аргагүй санал байлаа. Юнайтед клубт тоглож байгаа Чилийн анхны хөлбөмбөгчин болсноороо маш их бахархаж байна. Тэгээд мэдээж хэрэг дэлхийн өнцөг булан бүрт байгаа багийнхаа хөгжөөн дэмжигчдэд намайг яагаад авч ирсэн бэ гэдэг асуултын хариултыг үзүүлэх болно гэж найдаж байна” хэмээн Санчез шинэ багт нэгдсэн анхны сэтгэгдлээ хуваалцлаа.

Харин тус багийн менежэр Моуринью “Алексис бол дэлхийн хамгийн шилдэг довтлон тоглогчдын нэг, тийм ч учраас манай авьяаслаг залуу довтлогчдын дутаад байсан орон зайг тэр бүрэн дүүргэх болно. Түүний амбиц, хувийн зан чанар, дайчин байдал зэрэг нь Манчестер Юнайтед багийн  тоглогчдод эерэгээр нөлөөлж, манай багийг хүчирхэгжүүлснээр хөгжөөн дэмжигчид маань клубээрээ бахархах болно” хэмээн шинэ тоглогчийнхоо талаар ярьжээ.

Санчез 4 жил хагасын гэрээг үзэглэсэн бөгөөд бүх татвараа төлөөд эцсийн байдлаар авах мөнгөн дүн нь 14 сая фунт стерлинг байх юм.

Харин Мхитаряны хувьд 2016 онд Боруссиа Дортмунд клубээс  26.3 сая фунтээр Олд Траффорд цэнгэлдэхэд ирж байсан юм. “Улаан чөтгөрүүд”-ийн бүрэлдэхүүнд тэрбээр 39 тоглолтод оролцож, 5 гоол оруулсан. Тэрбээр өнгөрсөн жил багийнхаа хамтаар Европа лигт түрүүлсэн.

“Бид энэ наймааг амжилттай болгож, энд ирсэндээ би маш их баяртай байна. Миний хувьд байнга Арсеналд тоглох юмсан гэж бодож явдаг байсан учраас мөрөөдөл биелсэн мэт санагдаж байна. Эцэст нь би хүссэн газраа ирлээ. Тиймээс агуу түүхийг бүтээхэд нь чадлынхаа хирээр хичээх болно” хэмээн Армен хагас хамгаалагч ярив.

Харин Арсеналын босс Арсен Венгер шинэ цэргийнхээ талаар “ Хенрих бол маш олон талт тоглогч. Тэр боломжуудыг маш сайн гаргадаг. Бас сайн хамгаалдаг. Түүнийг бүх төрлийн чадвартай тоглогч гэдгийг нь би заавал хэлэх хэрэгтэй” хэмээжээ.

Б.Энх-Амгалан