Их аварга Хакүхо М.Даваажаргал. Кисеносато Ютака, Какүрю Ананд нар Токио хотын Меижи сүмд шинэ оны дэвжээнд гарах уламжлалт ёслол үйлдлээ.

2018 оны эхний башё 1-р сарын 14-ний өдөр эхлэх юм. Эхлээд их аварга Хакүхо ёслол үйлдсэн.  Ёслолыг үзэхээр Меижи сүмд 2800 гаруй  сүмо сонирхогчид цугларчээ. Дэвжээн дээр аюулгүй байх, шинэ оны тэмцээнд амжилт хүсч  залбиран энэ ёслолыг жил бүрийн эхээр үйлддэг юм байна.

Мэргэжлийн сүмо бөхийн 69 дэх  Их аварга Хакүхо энэ онд 1000 дахь ялалтаа авч, ёкозүна цолтой хамгийн олон буюу 63 башё барилдсан Китаномигийн амжилтыг эвдэхийг зорино хэмээн ярьжээ. Харин мэргэжлийн сүмогийн 72 дахь их аварга Кисеносато бэлтгэлдээ гол анхаарлаа хандуулж байгаа гэж хэлсэн байна. Тэрээр өнгөрсөн жилийн эхний 2 башёд түрүүлсэн билээ.

Харин Ёкозүна Какүрю өнгөрсөн жил 4 башёд барилдаагүй. Тэрээр хөгжөөн дэмжигчдээ баярлуулахын тулд сайн барилдахыг хичээнэ хэмээн сэтгүүлчдэд  ярьсан юм.

Б.Энх-Амгалан