Бразилын теннисчин Томас Беллуччи сэргээшийн шинжилгээнд бүдэрснээ 5 сар тэмцээнд оролцохгүй байх шийтгэл амсаж байсан билээ.

Өнгөрөгч 7 сард болсон Шведийн нээлттэй тэмцээний үеэр авсан шинжилгээний хариу эерэг гарсан бөгөөд Олон Улсын Теннисийн Холбооноос гаргасан мэдэгдэлд түүний биеэс хоёр төрлийн сэргээшийн төрлийн бэлдмэл илэрсэн гэнэ. Ингэснээр 30 настай теннисчин эр 5 сарын хугацаанд ямар нэгэн олон улсын чанартай тэмцээнд оролцох боломжгүй болж байлаа.

Гэхдээ үүнийг санаатайгаар хэрэглээгүй бөгөөд эдгээр сэргээшийн бэлдмэл нь түүний нэмэлтээр хэрэглэдэг хүнсний нэмэгдэл витаминд агуулагддаг болохыг тогтоосон байна. 

2010 онд дэлхийн чансааны 21 дүгээр байранд хүртэл бичигдэж, оргил амжилтаа гаргаж явсан теннисчин эр энэ талаараа “Эм зүйчийн бичиж өгсөн олон төрлийн витамины агууламжтай энэ эмэнд ийм зүйл байсан гэдгийг төсөөлөө ч үгүй. Би уг нь иймэрхүү зүйлд үргэлж хүндэтгэлтэй хандаж, хууль дүомийг дагадаг” гэсэн товчхон тайлбар өгсөн юм.

Уг шийтгэлийг 8 сард ноогдуулаад байсан бөгөөд одоо 2 сарын 1-нд шийтгэлийн хугацаа дуусч байгаа юм.

Б.Энх-Амгалан