Олон Улсын Олимпын Хорооноос ОХУ-ыг сэргээшийн асуудлаар ээлжит Өвлийн Олимпод оролцох эрхийг хасаад байгаа билээ. Сочигийн Олимпод засгийн газрын бодлогоор нийт баг тамирчдад сэргээш өгсөн гэх уг хэргээс болж хэд хэдэн тамирчин бүх насаараа тэмцээн уралдаанд оролцох эрхээ хасуулаад байгааг бид өмнө нь мэдээлж байсан. Тэгвэл дахин 11 тамирчин бүх насаараа Олон Улсын чанартай тэмцээнд оролцох боломжгүй болжээ.

Нэг хүний чарганы төрөлд Сочид мөнгөн  медаль хүртэж байсан Алберт Демченко, Татъяна Иванова нарын тамирчид уг шийтгэлийг авлаа. Уг хоёр тамирчинтай адил шалтгаанаар тамирчны замналаа харлуулж байгаа тамирчид дунд тэшүүрийн 2 тамирчин, цанын кросс төрлийн 3 тамирчин, бобслэйн хоёр тамирчин болон хоккейн хоёр тамирчин тус тус багтаад байна.

Ингэснээр уг хэрэгт холбогдсон тамирчдын тоо 43 хүрээд байна.

ОУОХ-оос гаргасан мэдэгдэлд “Зарим хэргүүд одоо ч мөрдөн байцаах шатандаа үргэлжилж байгаа. Хэрэг явдал цаашлах тусам шинэ төрлийн бэлдмэл, шинэ нөхцөл байдал, нотлох баримтууд илэрсээр байна” гэжээ.

Одоогийн байдлаар ОХУ-ын авсан 33 медалийн 13 нь сэргээшийн асуудлаар хүчингүйд тооцуулаад байгаа юм. Бүх шигшээ баг системээрээ ийм хэрэгт холбогдсон хэргээс шалтгаалж дараа жилийн Пёнчаны Олимпод ОХУ-ын нэр цэвэр тамирчид хүртэл ОУОХ-ны туган доор орж, медаль авах үед нь Олимпын сүлд дуу эгшиглэхээр болоод байгаа билээ.

Б.Энх-Амгалан