Хүнд жингийн хоёр удаагийн аварга Шэннон Бриггс 2018 онд рингэндээ эргэн ирнэ гэж мэдэгджээ. Тэрбээр сэргээшийн улмаас тулааны эрхээ хасуулаад байсан юм. Тэгвэл 46 настай боксерийн хувьд хүнд жингийн хамгийн ахмад аварга болохын төлөө бүхнийг хийнэ гэжээ.

“Бэлтгэлдээ эргээд орж байгаадаа баяртай байна. 2018 онд тулалдахыг үнэхээр хүсэж байна. Өнгөрөн жил миний хувьд хүндхэн жил байлаа. Маш удаан өнгөрлөө.маш олон зүйлийг эргэж харсан цаг хугацаа байсан. Гэхдээ бүх хүнд хэцүүг даван туулаад ирээдүйгээ өөдрөгөөр харж байна” хэмээн өөрийн мэдэгдэлдээ дурьджээ.

Хэрвээ тэрбээр өөрийн зорилгодоо хүрч чадвал Жорж Форманы 45 насандаа аварга болж байсан түүхэн амжилтыг эвдэх учиртай юм. Бриггс олон Улсын Боксын Холбооноос хийсэн сэргээшийн шинжилгээнд бүдэрч 6 сараар тулалдах эрхээ хасуулсан. Энэ үйл явдал 6 сард товлоод байсан Фрэс Окүйндогийн эсрэг тулааны өмнөхөн болж байлаа. Харин түүний шийтгэлийн хугацаа өнгөрсөн сараар дуусгавар болжээ.

Замналынхаа турш 66 тулаанд орж 60-6 гэсэн амжилттай яваа Бриггс уг тулааны 53-ыг хүнд цохилтоор хугацаанаас нь өмнө дуусгаж байлаа.

Б.Энх-Амгалан