Мэргэжлийн сүмогийн 70 дахь их аварга Харүмафүжи нартай холбогдох 10 сарын 25-нд Тоттори хотноо гарсан уг хэргийг өчигдөр прокурорт шилжүүлжээ. Өдгөө 33 настай Харүмафүжи нь арван долоон жил үргэлжилсэн өөрийн замналыг уг хэргээс болж өндөрлүүлэхэд хүрсэн юм. Сүмогийн холбооноос уг хэргийн талаархи эцсийн дүгнэлтийг 12 сарын 20 гэхэд авна гэж тооцоолж байгаа гэнэ.

Хэрэгт холбогдох эх сурвалжуудын мэдээлж буйгаар Харүмафүжи Кохей буюу Д.Бямбадорж нь 10 сарын 25-нд нутаг нэгт сүмоч болох Таканойва А.Баасандоржийг нударга болон караоке машины удирдлагаар цохиж гэмтээсэн хэрэг нэгэн шөнийн цэнгээний газарт болсон юм. Үүнээс улбаалж 27 настай Таканойвагийн тархи хөдөлж 10 хоног эмчлүүлэх шаардлагатай болсон гэж цагдаад өгсөн эхний мэдүүлэгтээ дурьджээ. Түүний гавлын яс цуурч, хэд хэдэн гэмтэл авснаас шалтгаалж Фүкүока хотын эмнэлэгт хэвтэн эмчлүүлсэн юм.

Харүмафүжи нь цагдаагийн байцаалтын явцад хэргээ сайн дураар хүлээсэн бөгөөд түүний өмгөөлөгч, хуулийн зөвлөх нар нь Таканойва болон бусад хүмүүсээс чин сэтгэлээсээ уучлал хүсээд, гэмшиж буйгаа илэрхийлсэн гэж эх сурвалжууд мэдээлж байна. Мөн Таканойва болон түүний багш Таканохана нартай биечлэн уулзах хүсэлт гаргасан аж.

Мөрдлөгийн явцад их аварга Хакүхо М.Даваажаргалыг Таканойвад зөвлөгөө өгч байхад үл тоосонд Харүмафүжигийн эгдүүцэл төрсөн гэж тогтоосон байна. Үүнийгээ ч зодог тайлах тухайгаа зарлах хэвлэлийн бага хурлын үеэрээ Харүмафүжи илэрхийлээд дэвжээний гадна ч хүлээсэн дүүгээ сургах үүргээ биелүүлэх явцдаа ийм зүйлтэй учирсан гэдгээ мэдэгдсэн юм.

Сүмо бөхийн холбооны мэдээлж буйгаар их аварга Хакүхо Таканойваг сургуульд байхаас сурч мэдсэн ааш зангаа битгий гээгээрэй гэж хэлэх үед Таканойва утсаараа оролдож байсан гэнэ. Тэгээд ингэж хэлэх үед нь найз охиноос нь зурвас ирсэн гэж хэлсэн аж.

Энэ хэргээс болж Харүмафүжи Д.Бямбадорж аварга нь ёкозуна хүний хэм хэмжээг зөрчиж, даган биелүүлээгүй гэдэг шалтгаанаар зодог тайлахад хүрсэн юм. Гэхдээ эртний уламжлал түүхт сүмо бөх сонирхогч үзэгчид түүнийг цагаасаа эрт зодог тайлж буйд харамсаж байгаагаа илэрхийлсээр байна.

Мэргэжлийн сүмод 2001 онд анх удаа Ама нэртэйгээр барилдаж байсан Харүмафүжи хэмээх Даваанямын Бямбадорж нь 2012 онд их аварга цолонд хүрч, нийт 9 удаа дээд зиндаад түрүүлж байсан юм.

Уг хэрэг нь сүмо бөхийн ертөнцөд гарсан анхны хүчирхийлэлтэй холбоотой хэрэг биш юм. Өмнө нь 2010 онд Монголын өөр нэгэн сүмоч болох ёкозүна Асашёрюү Д.Дагвадорж нь согтуудаа адил төстэй хэрэг мөн гаргаж байсан бөгөөд удалгүй зодог тайлж байсан билээ.

Эх сурвалж: www.japantimes.co.jp

Б.Энх-Амгалан