10 сарын 26-нд шөнийн цэнгээний газарт Таканойва А.Баасандоржийг цохиж гэмтээсэнтэй холбоотой хэргээр Японы сүмо бөхийн ёкозуна нарын зөвлөл болон мэргэжлийн сүмо бөхийн холбооноос түүнийг зодог тайлах, эсвэл холбооны зүгээс барилдаанд оролцох эрхийг хасах гэсэн сонголт өгөөд байсан юм.  Үүнээс улбаалж өнөөдөр өглөө сүмо бөхийн холбоонд зодог тайлах хүсэлтээ өгч, 13 цагт хэвлэлийн бага хурал зарлаад байсан юм.

Уг хэвлэлийн бага хурлын үеэр сүмо бөхийн 70 дахь их аварга Харүмафүжи Д.Бямбадорж болон түүний дэвжээний багш Асахифүжи нар сэтгүүлчдэд зодог тайлах шийдвэрийн талаар ярьсан юм. Хэвлэлийн бага хуралд Японы хэвлэл мэдээллийн 140 гаруй сэтгүүлчид ирсэн байлаа. Ингээд хэвлэлийн бага хурлын үеэр багш Асахифүжи нь Харүмафүжиг өмнө нь бэлтгэлээ шаргуу хийж, хөдөлмөрлөж, нийгэмд чиглэсэн олон нийтийн сайн дурын ажилд ч ихээр оролцдлг байсныг дурьдаад өмнө нь ганц ч удаа архи ууж агсан согтуу тавьж байгаагүй гэв. Харин Харүмафүжи аварга болсон явдалд өөрийн дэмжигчид болон нийт сүмо сонирхогчид, энгийн иргэдээс уучлал гуйлаа.

Мөн зодог тайлах болсон шийдвэрээ багштайгаа ярилцаад аварга хүний хариуцлагыг ухамсарлаад уг шийдвэрийг гаргасан гэв. Мэдээж хэрэг уг шийдвэрээ 11 сарын башё үргэлжилж байхад зарлах боломжгүй байсан учраас башё дууссаны дараа зарлаж байгаа гэв. Харин болсон явдлын тухай асуусан сэтгүүлчийн асуултанд сүмогийн ертөнц бол ах нь сургаж, дүү нь сонсож, хойч үедээ уламжлалаа өвлүүлдэг спорт гэдгийг дурьдаад өнөөг хүртэл үүнийг хичээж байсан боловч Таканойвад үүнийг ойлгуулах гэж байх үеэрээ уг болчимгүй үйлдлийг гаргасан гэв.

Мөн 16 настай байхад Япон улсад ирснээс хойш дэмжиж, зааж сургаж байсан багш, дэмжигчдэд баярлалаа гэдгээ уламжлаад, дахин уучлал гуйсан юм. Мөн сүмогийн ертөнцөд өнгөрүүлсэн 17 жил хамгийн сайхан цаг үе байсан гэдгийг удаа дарааллан дурьдаж байв. Мөн 17 жил барилдсаны эцэст ийм маягаар сүмогоос холдож байгаадаа харамсаж байгаагаа илэрхийлээд багшийнхаа  ачийг ямар нэгэн байдлаар хариулна гэдгээ ч дурьдав. Мөн Таканойваг санаатайгаар гэмтээгээгүй гэдгээ илэрхийлээд, сургах гэж байхад ийм зүйл болсон гэдгийг зөвөөр ойлгохыг хүсэж байв. Ингээд эцэст нь Хакүхо М.Даваажаргалын башёгийн төгсгөлд хэлсэн Таканойва болон Харүмафүжи хоёрыг дахин барилдахыг харахыг хүсэж байна гэсэн үгэнд маш их баярласан гэдгээ уламжлав.

Б.Энх-Амгалан