Японы Кёодо мэдээллийн агентлагийн мэдээлснээр сүмогийн ёкозуна нарын зөвлөлөөс Японы Сүмо Бөхийн Холбоонд Харүмафүжи болон Таканойва нарт холбогдох хэргээр Харүмафүжи Д.Бямбадоржид хамгийн хатуу шийтгэл оногдуулах санал хүргүүлсэн байна. Мөн удирдах байгууллагын зөвлөх хорооноос Харүмафүжиг буцааж барилдахыг хүсэж байгаа гэдгээ илэрхийлсэн их аварга  Хакүхо М.Даваажаргалыг ч буруушаан шүүмжилжээ.

Манай хоёр сүмочтой холбоотой уг хэрэг өнгөрсөн 10-р сард болж уг хэрэг болсон гэдгийг Харүмафүжи аварга хүлээн зөвшөөрч уучлалт гуйгаад байсан юм. Үүнээс улбаалж Харүмафүжи Д.Бямбадорж болон Таканойва А.Баасандорж нар аль аль нь 11 сарын башёд барилдаагүй.

Ёкозуна нарын зөвлөлийн тэргүүн Масато Китамура “Сүмо бөхийн нэр хүндэд их сэвтэй үйл явдал боллоо. Үзэгч, хөгжөөн дэмжигчдийг ч цөөлөх аюултай байж болзошгүй юм” хэмээн Кёодо агентлагт ярилцлага өгөх үеэрээ дурьдсан байна.

Уг хэргийг Таканойва А.Баасандоржийн дэвжээний багш Таканохана орон нутгийн цагдаа нарт мэдэгдсэнээр анх эхэлсэн юм. Харин уг хэрэгтэй холбоотойгоор 40 дэх түрүүгээ хүртээд байсан Хакүхо 11 сарын башё өндөрлөсний дараа тус хоёр сүмочийг хоёуланг нь эргэн барилдуулах хүсэлтэй байгаагаа илэрхийлээд, үзэгчдийг өөрийгөө дэмжихийг уриалсан нь ёкозуна нарын зөвлөлийнхний болон сүмо бөхөөр дагнан бичдэг сэтгүүлчдийг өөрийнхөө эсрэг талд гаргасан билээ.

Үүнтэй холбоотойгоор Китамура “Харүмафүжи аварга сүмо бөхийн ертөнцийг бүхэлд нь донсолгоод байхад яаж “Банзай” гэж үзэгчдээр өөрийгөө дэмжүүлэхийг хүсэж болох вэ” хэмээн нэмж хэлсэн байна. Өчигдөр мэдээлж байсанчлан Хакүхогийн тус ярилцлага болон башёгийн 11 дэх өдөр унасныхаа дараа барилдааны үр дүнг хүлээн зөвшөөрөхгүй “матта” буюу дахин барилдах санал гаргасан явдалд нь Хакүхог мөн шүүмжилж байгаа юм.

Ингэснээр Харүмафүжи өөрт холбоотой хэрэгт ганцаардах төлөвтэй болж ирж байгаа юм. Дээр дурьдсан хамгийн хатуу шийтгэлд нь Харүмафүжиг зодог тайлах, эсвэл сүмо бөхийн холбооноос барилдах эрхийг нь хасах гэсэн сонголтууд яригдаж байгаа аж.

Японы хэвлэлүүдэд уг хэрэгтэй холбогдуулан мэргэжлийн сүмогийн 68 дахь их аварга Асашёорюү Д.Дагвадоржийн хүн цохьсон хэргийг мөн дурьдаад үүнээс гадна 2010 онд гурван ахмад бөх 17 настай залуу сүмочийг бэлтгэлээс зугтсаных нь төлөө зодож амь насыг нь бүрэлгэсэн хэрэгт дэвжээний багш нь 5 жилийн хорих ял авч байсныг мөн цохон тэмдэглэжээ.

Энэ бүхнээс харахад Сүмо бөхийн ертөнцөд Харүмафүжи Д.Бямбадорж ганцаардаж, аргагүйн эрхэнд зодог тайлах магадлал өндөр болж байгаа юм. Харин Хакүхо М.Даваажаргалын хувьд өөрийн гаргасан үйлдэлдээ сануулга авч, ширүүн донгодуулах бололтой.

Мөн хэд хоногийн өмнө Японы хэвлэлүүдэд гарч байсанчлан Харүмафүжи аваргын барилддаг Исегахама дэвжээний багш Асахифүжи нь ойрын хугацаанд болох сүмо бөхийн холбооны сонгуульт ажлаас нэгмөр шахагдан гарах төлөвтэй байна.

Б.Энх-Амгалан