Кёкүшюзан Д.Батбаяр Япон улсыг зориод ирлээ. Тэрбээр сумогийн хоёр бөхийн хооронд үүссэн зодооныг зохицуулах гэж очсон ч хууль хяналтын байгууллагын асуудал болсон учраас боломжгүй болжээ. Тиймээс эх орондоо ирсэн гэдгээ хэлэв. 

Сумогийн бөхчүүдийн хооронд болсон асуудлаар Кёкүшюзан Д.Батбаяр

Манай бөхчүүд кароакед ууж байгаад архи нь хэтэрч, зодолдсон л асуудал байгаа юм. Түүнээс тэнд хоёр бөх биенээ дээрэлхсэн, ямар нэг өс хонзон ч юм уу, тийм зүйл огт байхгүй. Кёкүшюзан бол анхдагч нь, дээр нь Монголын сумо бөхийн холбооны удирдлага, бас Харумафүжи гээд олон бөхчүүдийг оруулсан хүн. Тиймээс та энэ хоёрыг уулзуулж, гар бариулаад, Японы хэвлэл мэдээллээр уучлалт гуйлгавал энэ асуудал намжина гэсэн санал тавьсан. Тэгээд уулзах гэсэн ч хоёулантай нь уулзаж чадаагүй. Нэг нь надтай утсаар ярьсан. Харин энэ асуудал уучлалт гуйгаад намжих боломжгүй асуудал болсон байна лээ. Учир нь энэ асуудал цагдаад шилжсэн байна. Хоёр захирал энэ хоёр тийшээ харчихсан. Сумо бөхийн холбоо танхайрах асуудлыг цаашид зогсооно гэсэн байр суурьтай байна. Тиймээс би зохицуулах боломжгүй учраас Монголдоо ирлээ” гэсэн тайлбарыг өглөө.

Харин Японы сумо бөхийн холбоо Монголыг бөхчүүдийг шахаж эхэлсэн үү гэх асуултад тэрбээр “Японы сумо бөхийн холбоо Монголын бөхчүүдийг шахсан юм огт байхгүй. Өмнө нь Аса аварга хүнд гарч хүрч, сумо бөхийн холбоонд бас асуудал болж байсан.Зүгээр байхад хөөхгүй. Өнөөдөр бас биенээ зодсон асуудлаас болж хөөнө, хөөхгүй гэж ярьж байгаа” хэмээн хариулав.

Мөн зарим хэвлэлээр Кёкүшюзан Д.Батбаярыг Японы талд ажилласан гэсэн мэдээллийн хариуд “Зодуулсан нь ч монгол, зодсон нь ч монгол. Тиймээс хэн нэгний талд гэсэн асуудал байхгүй. Харумафүжи би оруулсан, сайхан барилдаасай гэж хүсч байна. Нөгөөхийг нь ч хүнд гэмтээгүй байгаасай гэж найдаж байна” гэсэн хариултыг өглөө.

Хамгийн сүүлийн мэдээгээр Харумафүжиг зодог тайлуулж магадгүй боллоо. Эсвэл барилдаанд оролцох эрхийг нь хязгаарлах шийтгэл оноох бололтой. Японы Сүмогийн Холбооны Ёкозунагийн зөвлөл хуралдаж, доод зиндааны бөхийг зодож бэртээсэн Харумафүжид “онцгой хатуу хариуцлага” тооцох хэрэгтэй гэсэн дүгнэлт гаргасан нь энэ юм.

Б.Энэрэл