Формула1 ДАШТ-ий энэ улирлын сүүлийн ГранПри АНЭУ-ын Абу Даби хотод боллоо. Энэ жилийн уралдааны нисгэгчдийн цомын Мерседес багийн Их Британи нисгэгч Льюис Хамилтон хүртэх нь тодорхой болоод буй. Тиймээс Яас Марина авто тойруулгад болсон уг уралдааны үр дүн нийлбэр дүнд үзүүлэх нөлөө тун бага байсан юм.

Бямба гарагт болсон байрлал тогтоох уралдаанд Мерседес багийн Финлянл нисгэгч Валттери Боттас ялалт байгуулаад байсан бол араас нь Льюис Хамилтон, Себастиан Феттель нарын шилдгүүд оржээ.  

Харин ням гарагийн үндсэн уралдаанд энэхүү дараалалд өөрчлөлт орсонгүй. Үндсэн уралдаанд Финлянд нисгэгч ялалт байгуулсан байна.

Ийнхүү 2017 оны Формула 1 ДАШТ-нд улирлын туршид 363 оноо цуглуулсан Льюис Хамилтон түрүүллээ. Дөрөв дэх удаагаа Дэлхийн аварга болж байгаа Британи эр 2017 онд нийт 9 түрүү авсан юм. Харин араас нь Себастиан Феттель, Валттери Боттас нар орсон байна.

Тэгвэл зохион бүтээгчдийн цомыг Германы Мерседес баг хүртжээ.

Г.Баяраа