Ирэх онд зохиогдох Азийн 19 хүртэлх насны залуучуудын хөлбөмбөгийн АШТ-ий эрхийн төлөөх өрсөлдөөн Улаанбаатар хотод үргэлжилсээр байна. Хэдийгээр цаг агаарын нөхцөл байдал тааруу байсан ч хуваарийн дагуу хэсгийн хоёр дахь тоглолтууд болжээ.

Эхлээд Япон-Сингапурын багууд өрсөлдөж Японы баг 7-0 харьцаатай ялалт байгуулснаар хэсгээ итгэл төгс тэргүүлсэн хэвээр үлдсэн юм. Японы залуучууд урьдчилсан “I”хэсгийн эхний 2 тоглолтод нийт   14 гоолыг оруулснаас гадна хоёр тоглолт дараалан хаалгаа хуурай манаад байна.

Тэгвэл энэхүү тоглолтын дараа талбайн эзэн Монгол-Тайландын багууд тоглосон байна. Тун өрсөлдөөнтэй үргэлжилсэн уг тоглолтын эхэнд талбайн эзэд хэд хэдэн гоолын боломж үүсгэсэн ч бүрэн ашиглаж чадаагүй байна. Харин Тайландын баг сөрөг довтолгоог тун үр дүнтэй хийж байсан бөгөөд үндсэн цагт 5-2 харьцаатай ялалт байгуулснаар ААШТ-г зорих боломжоо хадгалжээ.

Манай залуусаас 48 дахь минутанд Д.Билгүүн, 86 дахь минутанд Г.Бат-Оргил нар гоол оруулсан аж. Энэхүү тоглолтод ялагдал хүлээснээр манай улсын залуучуудын шигшээ баг ААШТ-ийг зорих боломжгүй боллоо. Харин тэмцээний эрхийн төлөө Тайланд-Японы багууд өрсөлдөх болсон бөгөөд маргааш тус хоёр баг хоорондоо тоглох юм.

Харин манай улсын багийн хувьд сүүлийн тоглолтоо Сингапурын багтай хийнэ.

Г.Баяраа