Европын хөлбөмбөгийн холбооны Аваргуудын лигийн тэмцээний цомыг жил бүр Европын зарим орнуудаар  аялуулдаг уламжлалтай. Тэгвэл энэ жилийн хуваарьт Итали улс багтсан бөгөөд шилдэг хөлбөмбөгчдийн эх орноор үргэлжилсэн цомын аялал өчигдөр өндөрлөжээ.

Уг аялал Милан хотоос эхэлсэн бөгөөд Аваргуудын лигийн түүхэнд тодоор бичигдэн үлдсэн шилдэг хөлбөмбөгчид аялалд оролцсон аж. Турин, Верона, Бари зэрэг найман хотоор дамжсан тус аялалын сүүлийн цэг нь Ром хот байсан юм.

Ром хотод Аваргуудын лигийн цомыг Испанийн Барселона багийн домогт хамгаалагч Карлес Пуйоль аялуулсан аж. Тэрбээр 2009 онд уг цомыг тус хотод өргөж байсан түүхтэй.

Аваргуудын лигийн цомыг анх 1966 онд урласан бөгөөд Швейцарийн дизайнер Йорг Стаделлман загварыг нь гаргасан аж. Бүхэлд нь мөнгөөр урласан уг цомын өндөр 74 см байдаг бол жин нь 11кг хүрдэг аж.      

Г.Баяраа