Энэ сарын 18-21 хооронд Хорват улсын Загреб хотод болж буй жүдо бөхийн Залуучуудын ДАШТ-ий 57 кг-ын жингийн ангилалд өрсөлдсөн Үндэсний Биеийн тамирын дээд сургуулийн оюутан, үндэсний шигшээ багийн тамирчин ОУХМ Л.Энхрийлэн мөнгөн медаль хүртсэн байна. Тэрбээр ШШГЕГ-ын Сүлд спорт хорооны дасгалжуулагч Ц.Шийрэв багшийн удирдлага доор анх жүдо бөхөөр хичээллэж эхэлсэн юм.

Уг тэмцээнд нийт 83 орны 590 гаруй жүдоч оролцож байгаа юм. Эдгээр 83 орноос 25 орон ямар нэгэн байдлаар медаль хүртээд байна. Манай улсын хувьд 1 мөнгө, 2 хүрэл медальтай 7 дугаар байранд явж байгаа. Л.Энхрийлэн мөнгөн медаль хүртсэн бол эрэгтэй 55 кг-д зодоглосон Л.Өнөболд, Ж.Амарболд нар хүрэл медаль хүртээд байсан юм. Харин эмэгтэй -52 кг-д өрсөлдсөн Б.Хорлоодой шагналт тавдугаар байранд орсон амжилтыг тус тус үзүүлээд байна.

Тэмцээний хүнд жингүүд болох эрэгтэй 81, 90, -100, +100 кг, эмэгтэй 63, 70, -78, +78 кг-ын жингийн барилдаанууд өнөөдөр маргааш хоёр өдөр явагдах болно. 81 кг-д Б.Батбилэг, 90кг-д Б.Тэнгис, -100 кг-д О.Хангал, +100 кг-д Б.Лхагвадорж нар барилдана. Харин эмэгтэйчүүдээс 63 кг-д М.Даваасүрэн, О.Саруул, 70 кг-д А.Оюунгэрэл нарын тамирчид барилдахаар үлдээд байга юм.

Б.Энх-Амгалан