МСБХ-оос энэ жил хэсэг хугацаанд завсардаад байсан оюутны лигийг дахин зохион байгуулахаар болсон. МакДэвид брэндтэй хамтран зохион байгуулах уг тэмцээний техникийн зөвлөгөөн маргааш болох юм байна. Багагүй хугацаанд завсарласан уг тэмцээнд энэ жил манай их дээд сургуулиудын шигшээ багууд 30 сая төгрөгийн төлөө өрсөлдөх юм. Мөн үүнээс гадна хэд хэдэн боломжийг оюутны сагсан бөмбөгийн ертөнцийнхөнд амлаж байна.

Албаны хүмүүсийн мэдээлж буйгаар энэ лигт од болж чадсан тоглогчдод NCAA-д тоглох боломж олдохын хажуугаар сургуулиа төгсөөд дээд лигт драфтлагдан тоглох боломж, мөн байнгын ажлын байр зэрэг амьдралын баталгаа, хүсэл сонирхлыг нь хангасан боломжуудыг амлаж байгаа юм. Уг тэмцээний нээлт 10 сарын 26-нд болох ажээ.

Уг тэмцээнд оролцох сонирхолтой эрэгтэй багууд 1 сая төгрөг, эмэгтэй багууд 800 мянган төгрөгийн хураамж төлж оролцоно. Улирлын тоглолтууд их дээд сургуулиудын тус тусын спорт заал болон дундын зааланд болох бөгөөд шигшээ тоглолтуудыг Спортын Төв Ордонд явуулахаар төлөвлөөд байгаа юм байна.

Б.Энх-Амгалан