Ирэх жил манай хойш хөршид болох хөлбөмбөгийн ДАШТ-нд нийт 32 баг орохоос 23 нь тодорхой болоод байна. Үлдсэн 9 шигшээ багийн 4 нь Хөлбөмбөгийн спорт хамгийн өндөр хөгжсөн бүс болох Европ тивээс тодрох учиртай. Тэгвэл өнгөрсөн шөнө Швейцарийн Цюрих хотод байрлах ОУХБХ-ны төв байранд 8 багийн хооронд оноолт хийх сугалаа болжээ.

Европын бүсийн эхний шатанд ЕХБХ-ны гишүүн 54 орны багууд бүгдээрээ тоглосон бөгөөд хэсгээ тэргүүлсэн 9 баг шууд Оросын зорих эрхээ авсан. Харин дэд байраар шалгарсан 9 багийн 8 нь плейоффын сугалаанд оролцож, хамгийн тааруу үзүүлэлтэй нэг баг нь шууд гэртээ харих болсон юм. Энэ удаад хэсгийн шатнаас 12 оноо цуглуулсан Словакийн шигшээ баг хасагдсан байна.

Ингээд үлдсэн 8 багийг ОУХБХ-ны чансаагаар ангилан 2 сагсанд хийжээ. Өөрөөр хэлбэл өндөр чансаатай клубүүд хоорондоо таарахгүй байхаар бодолцсон аж.

Ийнхүү сугалааг явуулахад:

Хойд Ирланд-Швейцарь

Хорват-Грек

Дани-Ирланд

Швед-Итали  гэсэн багууд учраа таарсан байна.

Эдгээр клуб дүрэмд зааснаар эзэн, зочин гэсэн 2 тоглолтыг хийж, нийлбэр дүнгээр ялагчид тодрох юм. Эхний тоглолтууд 11-р сарын 9-11-ний өдрүүдэд болох бол хариу тоглолтууд 12-14-ний өдрүүдэд болж, ОХУ-г зорих 4 багийн нэр тодрох юм.

Г.Баяраа