Мэргэжлийн гольфийн Европын цуврал ангилалд багтах Италийн нээлттэй тэмцээн Монца хотод боллоо. Нийт 3.5 сая долларын шагналын сантай тус тэмцээнд Английн гольфчин Тайрелл Хаттон түрүүлжээ.

Мэргэжлийн гольфийн Италийн нээлттэй тэмцээн нь 1925 оноос эхлэн зохион байгуулагдсан.  Анхны тэмцээнд талбайн эзэн орны тамирчин Франческо Паскуали түрүүлж байсан түүхтэй.

Тэгвэл энэ жил Английн 26 настай залуу тамирчин Тайрелл Хаттон 18 дахь нүхэнд 15 тохой газраас шийдвэрлэх цохилтоо амжилттай болгож 2 долоо хоногийн хугацаанд Европын цуврал ангилалд багтах 2 дахь тэмцээндээ түрүүлжээ.

Англи залуу өнгөрөгч 7 хоногот мэргэжлийн гольфийн хаан хэмээн нэрлэгддэг Алфрэд Данхилын нэрэмжит тэмцээнд түрүүлсэн билээ.

Мэргэжлийн гольфийн дэлхийн чансааг тэргүүлсэн шилдэг 10-н гольфчин оны төгсгөлд  Арабын Нэгдсэн Эмирт улсын Дубай хотноо өрсөлддөг.

Одоогийн байдлаар Тайрелл Хаттон дэлхийн чансааны 5-д бичигдэж байна.

Бямба гарагт 26 нас хүрсэн Хаттон 4-н шатны турш хасах 21 оноо цуглуулсан бол талбайн эздийн гол найдвар өнгөрсөн жилийн аварга Франческо Молинари 6-р байр эзэлжээ.

Тэмцээний ялагч Тайрелл Хаттон шагналын санд 1.1 сая долларын чек гардан авчээ.

Б.Энх-Амгалан