Албани улсын нийслэл Тирана хот өчигдөр 2 дахь удаагийн “Тираны хагас марафон” тэмцээнээ амжилттай зохион байгууллаа. Уг хагас марафонд 40 гаруй орны 2500 шахам гүйгч оролцсон байна.

Уг марафон нь Тереза эхийн талбайгаас эхэлж, Тирана хотын гудамжуудыг туулсан маршруттай байжээ.

Хоёр дахь удаагийн “Тираны марафон”-ыг Тирана хотын захиргаа болон Албаний хөнгөн атлетикийн холбоо хамтран зохион байгуулсан байна. Уг марафон нь хотыг аялал жуулчлалын идэвхитэй газар болгох, таниулан сурталчилах гол зорилготой юм байна. Энэ талаар хотын захирагч Эржон Велиаж сэтгүүлчдэд өгсөн ярилцлагатаа дурьджээ.

Тиймдээ ч уг марафон нь хотын хамгийн үзэсгэлэнтэй, түүхийн дурсгалт газруудаар дайрч өнгөрөх маршруттай болдог юм байна.

Мөн уг марафоныг зохион байгуулахад 660 гаруй сайн дурынхан, цагдаагийн албан хаагчид, онцгой байдлын баг зэрэг хүмүүс ажилласан байна.

Харин марафон нь гурван ангилалд болж өнгөрсөн. 22 км-ийн марафон, 10 км-ийн марафон болон сонирхогчдын “Бид ч бас” ангилалд явагдсан байна.

Мөн хоёр дахь удаагийн марафоны үеэр Дэлхийн Хөнгөн Атлетикийн холбооноос уг марафоныг Олон улсын марафон болон холын зайн тэмцээн гэсэн ангилалд хамруулж, сертификатжуулсан байна.

Б.Энх-Амгалан