Монголын Хөлбөмбөгийн Холбооны хамгийн нэр хүндтэй тэмцээнүүдийн нэг “Холбооны цом”-ын 2017 оны аварга баг өнгөрсөн ням гарагт тодорлоо.

Нийслэл хотоор овоглосон “Улаанбаатар сити”, “Эф Си Улаанбаатар” багууд өнгөрсөн жил “Холбооны цом”-д учраа таарахад цэнхэр өмсгөлтнүүд 8:4-өөр хожиж байсан аж. Тэгвэл энэ жил тус багууд финалд таарсан бөгөөд тоглолтын гоолын салхийг “Эф Си Улаанбаатар”-ын шилдэг хагас хамгаалагч О.Баяржаргал хагалсан юм. Харин  хариу гоолыг ОХУ-ын легионер Артём Дробишев оруулж, тооны харьцааг тэнцүүлэв. Нэгдүгээр үеийн цаг дуусч шүүгч нэг минутыг сунгаж өргөхөд “Улаанбаатар сити”-ээс Ж.Сүндорж тоог 2:1 болгож баг нь эхний хагаст тэргүүллээ.

Өнгөрсөн жил “Холбооны цом”-ын хагас шигшээд “Хангарьд”-д хожигдож тэмцээнийг өндөрлүүлж байсан “Улаанбаатар сити” хоёрдугаар үед тэргүүллээ амжилттай хамгаалснаар, 2017 оны Холбооны цомын аварга болжээ. Шийдвэрлэх үед “Улаанбаатар сити”-ээс Ц.Түмэнжаргал /65’/, О.Мижиддорж /80’/ дахь минутад гоол оруулсан бол “Эф Си Улаанбаатар”-ын О.Баяржаргал 69’ дэх минутад дахин нэг гоолыг торгуулийн цохилтоос гоол оруулсан байна. Ийнхүү  дээд лигийн залуу багуудын нэг “Улаанбаатар сити” анх удаа “МХБХ-ны цом”-ын эзэн болсон бол “Эф Си Улаанбаатар” мөнгөн медаль хүртжээ. Харин 2017 оны хагас шигшээд “Эрчим”, “Дэрэн” клубүүд шалгарсан юм.

Энэ жил “МХБХ-ны цом”-д “Хүрхрээ үндэсний лиг”, “Хүрхрээ нэгдүгээр лиг”, болон УАШТ-д оролцдог нийт 30 баг өрсөлдсөн нь урьд өмнө байгаагүй өндөр үзүүлэлт байсан аж. Аваргын цомыг өргөсөн “Улаанбаатар сити” 12 сая, мөнгөн медалийн эзэд “Эф Си Улаанбаатар” 8 сая төгрөгөөр шагнуулсан бол хагас шигшээд үлдсэн “Эрчим”, “Дэрэн” клубүүд тус бүр 2.5 сая төгрөгийн эзэд болсон юм. Ийнхүү Монголын Хөлбөмбөгийн Холбоо 2017 оны талбайн улирал дуусч байна.

Г.Баяраа