Дэлхийн шилдэг багуудын нэг Реал Мадридын амжилтын гол нууц гэгддэг Испани хамгаалагч Серхио Рамос 2021 оныг дуустал багтаа үлдэхээр болжээ. Түүний өмнөх гэрээ 2019-2020 оны улирлаар дуусгавар болох байсан ч талууд тохиролцоонд хүрэхэд ямар нэг асуудал байсангүй.

Эх сурвалжийн мэдээлж байгаагаар талууд өмнөх гэрээний цалингийн дүн болон хугацааг өөрчилж байгаа аж. Реал Мадрид клуб ойрын өдрүүдэд С.Рамостой байгуулсан гэрээгээ албан ёсоор зарлах гэнэ.

Анх 2005 онд өөрийн төрөлх баг Севильяг орхин Реалд очиж байсан 31 настай Испани эрийн хувьд ийнхүү дахин 5 жил Мадридад үлдэх болжээ. Одоогоос 2 жилийн өмнө Английн Манчестер Юнайтед багт нэгдэх дөхсөн ч түүнийг авч үлдсэн нь маш зөв шийдвэр болж байлаа. Үүнийг клубын сүүлийн 2 жилийн амжилт тод харуулна.

Дэлхийн шилдэг хамгаалагчдийн тоонд багтах С.Рамос энэ улиралд Реалаас долоо хоногийн 200.000 фунтын цалинг авч байгаа нь К.Роналду, Г.Бэйл нарын араас орох үзүүлэлт билээ. Серхио Рамос Реал нийт 533 тоглолтод орж 69 гоолыг оруулж байгаа аж.  

Г.Баяраа