Калгари Флэймс баг 45 настай Яромир Ягртай нэг жилийн гэрээ байгууллаа. Флорида Пантерс багийг орхисноосоо хойш чөлөөт агент болоод байсан ирээдүйн алдрын танхимын гишүүн маань Калгари багтай гэрээ байгуулснаар 25 дахь улиралдаа NHL буюу хойд Америкын хоккейн лигт тоглохоор болж байна.

Ягр нь лигийн бүх цаг үеийн түүхэнд 765 гоол оруулж 1149 дамжуулалт өгснөөрөө домогт Уэйн Гретцкин ард бичигддэг нэгэн билээ. Мөн замналынхаа турш хоёр ч удаа Стэнлин цомыг өргөж, 13 удаа бүх одод болж байсан билээ. Өнгөрсөн улиралд Пантерсын бүрэлдэхүүнд 82 тоглолтод оролцож 16 гоол 30 ашигтай дамжуулалт өгсөн байдаг.

Түүний талаар багийн менежэр нь “Тэр одоо ч гэсэн шайбыг хаалганд хийх чадамжтай байгаа. Түүний тоглолтыг ойлгох ухаан нь одоо бол элит түвшинд оччихсон. Тэр одоо ч тоглолтын чухал хэсэг болж чадна. Тэр өөртэйгөө адил 45-тай залуусаас тэс өөр хүн. Тэр бидэнд тус болж чадна гэдэгт итгэлтэй байна.” хэмээсэн юм.

Б.Энх-Амгалан