Италийн дээд шүүхээс Италийн дугуйн од Марко Пантанигийн үхэлтэй холбоотой хэргийг аллага биш гэж үзлээ. Энэ талаар орон нутгийн хэвлэл мэдээллээр өнөөдөр танилцуулсан байна.

Уг хэргийг сөхвөл, 2004 оны 2 сарын 14-нд Римини зочид буудалд амь насаа алдсан байдалтай олдсон юм. Харин гэр бүлийнхний хүсэлтээр 2014 онд уг хэргийг дахин сөхөж, хавтас хэрэг нээгээд байсан ажээ. 2016 онд Риминигийн шүүх 34 настай дугуйч эрийн үхэлд аллагын шинж чанартай бүрэлдэхүүн хэсэг, нотлох баримт байгаагүй гэж үзсэн юм.

Гэвч Пантанигийн гэр бүлийг төлөөлдөг Антонио Де Рэнсис уг хэргийг дахин хянуулахаар улсын дээд шүүхэд давж заалдсан. Гэр бүлийнхнийх нь үзэж байгаагаар дугуйч эрийн үхэлд нь гадны нөлөө байсан гэнэ. Харин албаны хүмүүс дугуйч эрийг 1999 оны Жиро Де Итали уралдаанаас хасагдсан нь сэтгэл санааны тогтворгүй байдал бий болгож, үхэлд голлох буруутай гэж үзсэн юм.

1998 оны “Тур Де Франц” болон “Жиро Де Итали” уралдааны аварга Пантани нь 1999 онд Жиро Де Итали уралдааныг дахин тэргүүлж байсан юм. Харамсалтай нь ганцхан гараа дутуу байхад сэргээшийн шинжилгээнд бүдэрч, хасагдаж байсан түүхтэй.

Үүнээс хойш тэрбээр сэтгэл санаагаар их унасан бөгөөд, дахин топ түвшинд уралдаж чадаагүй билээ.

Б.Энх-Амгалан