Хуучин Их Британийн колони байсан орнууд буюу Хамтын нөхөрлөлийн орнуудад крикетийн спорт өндөр хөгжсөн байдаг. Тиймдээ ч энэ спортын лигүүд олон үзэгчтэй, тэр хэрээр том зах зээлтэй. Яг ийм орнуудын тоонд Пакистан улс багтана.   Тэгвэл тус улсын шигшээ багийн гол тоглогчдын нэг Халид Латиф өчигдөр хүндхэн шийтгэл сонссон байна.

Тэрбээр дотоодын лигийнхээ хэд хэдэн тоглолтод оролцохдоо өрсөлдөгчдөө авлига өгч, тоглолтын үр дүнд санаатайгаар нөлөөлж байсан нь тогтоогдсон аж. Улмаар удирдах байгууллагаас түүний тоглох эрхийг 5 жилээр хассан бөгөөд 1 сая рупи буюу 7020 фунтийн мөнгөн торгуулийг тавьсан байна. Энэхүү шийтгэл нь 31 настай Пакистан эрийн мэргэжлийн тамирчны замналын эцсийн цэг байх магадлалтай юм.

Г.Баяраа