.

УИХ-ын гишүүн Г.Уянгын зохион байгуулж буй “Монголын нэг өдөр-2014” нэртэй сандалтай жагсаал Чингисийн талбайд үргэлжилж байна. Жагсаалыг нээж УИХ-ын гишүүн Г.Уянга, УГЗ Г.Жамъян нар үг хэлсэн юм. Мөн УИХ-ын гишүүн О.Баасанхүү жагсаалд оролцогчдод хандан, өөрийн байр суурийг илэрхийлсэн. Тэрбээр “ордонд байгаа олигархиудыг ард түмэнтэй нэг саналтай болгох “зовлон”-г тээж энэ жагсаалд ирсэн” гэдгээ ч тодотгож байв.

:

Иргэн бүрийг зовлонгоо чирээд ир, богинохон маршруттай хүмүүст танилцуулъя гэж уриалсан Г.Уянга гишүүн гол зохион байгуулагчаар ажиллаж, гудамжны жагсаалын индрээс өөртөө төдийгүй өрөөлд үг хэлэх эрхийг олгож байна. Эх орны газар шороо, Нарантуул захын түрээс, малгүй малчин, долларын ханшийн өсөлт, СӨХ-гүй байр, олон намын систем, олон шашны урсгал, монгол хүний үнэ цэнэ, Э.Бат-Үүл даргын гаргасан шийдвэр гэхчлэнгээр жагсагчдад зовлон мундахгүй их байгаа бололтой. Гэвч жагсагчдын дунд лоозон болгож барьсан зовлонгоо ойлгохгүй, өмнөө юу гэсэн бичиг байгааг ч мэдэхгүй хүмүүс цөөнгүй байна. Долларын ханшийн өсөлт гэсэн бичиг барьсан өвөөгөөс энэ таны зовлон мөн үү гэж асуухад энэ үү гэж эргэлзэж байгаа харагдсан. Бас малгүй болсон малчин эх орны иргэн мөн үү гэсэн лоозонг өмнөө тавьсан өндөр настан зовлонгийнхоо ч учрыг олоогүй сууна лээ.

.

Ямартай ч ард түмний үгийг сонсч, тэдний асуудлыг төрийн чихэнд хүргэх жагсаалын санал санаачилга нь зөв. Харин цаг өнгөрөөх гэж ирсэн мэт харагдах өвөө эмээ нарын оролцооноос үр дүн хүлээхэд хэцүү санагдсан шүү.

.

В.Хэрлэн

Гэрэл зургийг Б.Бат