Дэвтэр, үзгээ дэлгээд, сурагчийн ширээгээ эзэнгүй орхиод бурхны оронд одсон 37 хүүхдийн гэгээн дурсгалыг хүндэтгэж, үеийн нөхөд нь эзэнгүй ширээнд нь гэрэлт зул өргөлөө.

Эрх чөлөөний талбайд зассан уг 37 хоосон ширээний эзэд зам тээврийн осолд өртөж амиа алдсан. Дахин ийм зүйл болгохгүйг зорьж, уг аюулаас хүүхэд багачуудаа хамгаалахын тулд энэ өдрийг нийслэлийн Замын цагдаагийн газрын Урьдчилан сэргийлэх хэлтсээс санаачлан “Хүүхдийг зам тээврийн ослоос сэргийлэх өдөр” болгон тэмдэглэж байна.

6

Үйл ажиллагаанд нийслэлийн зургаан дүүргийн ЕБС-ийн төлөөлөл 300 сурагч оролцож байна. Тэд жолоо барьж замын хөдөлгөөнд оролцдог хүн бүхэнд хандан “Ах эгч нараа бяцхан намайг харж байна уу”, “Би том болоод сайн жолооч болно”, “Жолооч таны гар бидний ирээдүй”, “Би хотоор явахдаа машинаас айдаг” гэх мэт уриатай самбаруудыг барьж, эрх чөлөөний талбайд жагссан.

7

Өнгөрөгч 2013 онд улсын хэмжээнд 37 хүүхэд зам тээврийн ослын улмаас амь насаа алдсан. Энэ бол нэг сургуулийн нэгэн ангийн сурагчидтай дүйцэх тоо. Зам тээврийн осолд өртсөн хүүхдийн 76,8 хувь нь явганаар буюу гэрээсээ сургууль, сургуулиасаа гэр хүртэлх замд явж байгаад осолд орсон. 21,4 хувь тээврийн хэрэгслээр, 1,3 хувь нь дугуйгаар зорчиж байгаа осолд өртсөн бол 0,5 хувь нь гэртээ, хашаандаа байж байгаад зам тээврийн ослын хохирогч болжээ.

6

Үйл ажиллагааны үеэр Хан-Уул дүүргийн 18 дугаар сургуулийн гуравдугаар ангийн сурагч н.Эрхэмбаяраас хичээлдээ явахдаа хэдэн зам гардаг, аав ээж нь хүргэж өгдөг эсэхийг асуухад “Би хичээлдээ ирж, очихдоо гурван зам гардаг. Аав, ээж маань өглөө хүргэж өгөөд орой ганцаараа харьдаг. Би харихдаа дандаа явган хүний гарцаар гардаг. Зарим жолооч нар зам тавьж өгөхгүй байдаг. Тэднийг замын хөдөлгөөндөө соёлтой оролцоорой” гэж хэлмээр байна гэсэн.

6

Хүүхдүүд замын хөдөлгөөнд анхаарал болгоомжгүй оролцох, зам хөндлөн гарахдаа гарц, гарамтай хэсгээр гарахгүй байх, асран хамгаалагчгүй хөдөлгөөнд оролцох, ойртон ирж буй тээврийн хэрэгсэлийн урдуур гүйх зэрэг замын хөдөлгөөний мэдлэг дутмагаас осолд өртдөг. Гэхдээ жолоочийн хариуцлагагүй үйлдэл, замын байгууламжаас хамаарч осолд өртөх явдал багагүй байгаа юм. Тухайлбал, Ерөнхий боловсролын сургуулийн сурагчид хичээлээ тараад зам хөндлөн гарахдаа болон сургуулийн орчимд зам тээврийн осолд өртөж, эрүүл мэнд амь насаараа хохирох тохиолдол гарч байна.

6

Үүнээс урьдчилан сэргийлэх зорилгоор Хөдөлмөрийн яамны харьяа Хөдөлмөр эрхлэлт үйлчилгээний төвөөс нийслэлийн зарим Ерөнхий боловсролын сургуулийн орчинд сайн дурын бүлэг ажиллуулах төслийг хэрэгжүүлээр болжээ. Уг төсөлд ажиллах иргэд өнөөдрийн үйл ажиллагаанд оролцсон. Тэдний нэг болох СБД-ийн 12 дугаар хорооны иргэн У.Бадамцэцэг “Би гэртээ ажилгүй суудаг. Тэгээд зүгээр сууж өөрийн хүүхдээс ялгаагүй бусдын үр хүүхдүүдийг гарцаар нь аюулгүй гаргаад сургачихвал гэж бодоод энэ төсөлд ажиллахаар бүртгүүлсэн. Манай охин БЗД-ийн 120 дугаар сургуулийн дөрөвдүгээр ангид сурдаг. Сургууль нь замын хажууд байдаг болохоор байнга очиж авч, хүргэж өгдөг” гэж ярилаа. Бусдын хүүхдийг өөрийнхөө хүүхэд шиг санаж, сайн дураараа хамгаалахаар бүртгүүлсэн энэ иргэд маргаашнаас эхлээд тус тусын хуваарилагдсан сургуулийн сурагчдыг зам хөндлөн гарах, зам тээврийн осолд өртөхөөс урьдчилан сэргийлэн, анхаарал тавьж, хүүхэд явган зорчигчийн аюулгүй байдалд анхааран ажиллана.

6

Энэ өдрийн үйл ажиллагаанд оролцож буй хамгийн бяцхан сурагч зургаан настай М.Гантунгалаг жолоо барьж замын хөдөлгөөнд оролцож буй хүмүүст хандаж “Гарцаар гарч байгаа хүмүүсийг сайн хараарай” гэж хэлсэн. Өнөөдрөөс яг хоёр сарын өмнө Сүхбаатар дүүргийн нутаг дэвсгэрт “Isusu Elf” маркийн автомашины жолооч явган хүний гарцаар зам хөндлөн гарч явсан зургаадугаар ангийн охиныг мөргөж амь насыг нь хохироосон хэрэг гарсан. Хариуцлагагүй, анхаарал болгоомжгүй, замын хөдөлгөний дүрмээ биелүүлдэггүй энэ хүмүүст бага ч гэсэн анхааруулга, дохио өгөхийн үүднээс “Хүүхдийг зам тээврийн ослоос урьдчилан сэргийлэх өдөр”-ийг тэмдэглэж байгаа. Хурдаа сааруул жолооч оо, хүүхэд зам хөндлөн гарч байна.

6

Б.Буд