Долоо хоног бүрийн лхагва гаригт Шинэчлэлийн Засгийн газрын гишүүд 11 11 төвд ажиллаж, утсаар болон цахим хаягаар хандсан  иргэдийн асуултад хариулдаг. Өнөөдөр болсон “Уулзах цаг” цахим ярилцлагад БХБ-ын сайд Ц.Баярсайхан оролцож иргэдийн асуултад хариулах үеэр 4200 гаруй хүн хандлаа. Иргэдийн олонх нь орон сууцны 8 хувийн зээлийн хөтөлбөр, зээлийн урьдчилгаа төлбөр, түрээсийн орон сууцны талаар сонирхож байлаа.  Өнгөрсөн жилийн зургадугаар сараас хэрэгжсэн орон сууцны 8 хувийн зээлийн хөтөлбөрт 31 мянган иргэн хамрагдсаны 17 мянга нь 16-20 хувийн зээлээс шилжсэн бол шинээр 15 мянган өрх орон сууцанд орж, зээлийн хөтөлбөрт хамрагджээ. “Амины орон сууцыг энэ хөтөлбөрт хамруулах асуудлыг Засгийн газрын хуралдаанаар ойрын хугацаанд хэлэлцүүлж шийдвэрлүүлнэ” гэж сайд хэллээ.

Сайд Ц.Баярсайхан “Ипотекийн зээлийг өнгөрсөн оны зургадугаар сараас хэрэгжүүлж эхэлсэн. Арав гаруй жилийн хугацаатай хэрэгжих хөтөлбөр. Байрны урьдчилгаа 30 хувийн тухайд эрсдлээс хамгаалах зорилгоор тогтоосон жишиг үнэ. Урьдчилгаа 30 хувийг бууруулчихвал тогтолцоогоо эвдэх аюултай. Тийм учраас урьдчилгаа 30 хувь байх ёстой босго гэлээ.   Яармагийн дэнжид баригдаж байгаа 1000 гаруй айлын орон сууцнаас эхний ээлжинд 567 айлын орон сууц ашиглалтад орсон. Борлуулалтын ажлыг Төрийн орон сууц, санхүүжилтийн корпораци хариуцна. Захиалга эхлэхээс өмнө журам гарна. Түүний дараа иргэдийн захиалгыг ТҮЦ машинаар авахаар ТОССК бэлтгэл хангаж байгаа тухай мэдээлсэн юм.   2012 онд 11 мянган орон сууцанд иргэд орж байсан бол өнгөрөгч 2013 онд 20300 орон сууц ашиглалтад оржээ.

Н.Энх