“МАХН-ын гишүүд дэмжигдийн холбоо”-ны тэргүүн Г.Баярсайхан, Б.Цэрэндорж, М.Ганзориг нарын хүмүүс МАХН-ыг татан буулгах шаардлагатай хэмээн удаа дараа хэвлэлийн хурал зохион байгуулсан. Хэвлэлийн хурал бүрээр МАХН шиг хэрэггүй нам байхгүй, татан буулгах хүсэлтээ Улсын Дээд шүүхэд гаргасан хэмээн мэдэгддэг билээ. Хамгийн сүүлд л гэхэд өнгөрөгч долоо хоногт Монгол ньюс мэдээллийн төвд  зохиосон хэвлэлийн хурлын үеэр зодоон цохион хийсэн. Тэдний энэхүү үйлдэл нь нийгэмд МАХН-ын нэр хүндийг унагааж буй гэнэ.

БЫ

Тэгвэл өнөөдөр МАХН-ын нарийн бичгийн дарга Г.Бямбасүрэн, Ёс зүйн хорооны дарга Г.Давааням нар “МАХН-ын гишүүд дэмжигдийн холбоо”-ны нөхдийн талаар мэдээлэл хийлээ. МАХН-ын нарийн бичгийн дарга Г.Бямбасүрэн энэ үеэр “Өнгөрсөн долоо хоногт болж өнгөрсөн гишүүнчлэл сэргээх, шинээр гишүүн элсүүлэх үйл ажиллагааны талаар олон яриа гарч байна. Манай намд гишүүнээр элссэн, гишүүнчлэлээ сэргээсэн хүмүүст олон дарамт шахалт гарч ирсэн. Тухайлбал, МУГТ С.Батцэцэгийг хүчээр элсүүлсэн, элсүүлсэн нь худлаа гэж мэдээлж байна. Миний гарт түүний гарын үсэг бүхий анкет байна. Бид тэдгээр нэр бүхий хүмүүсийн нэрийг нууцалж байсан нь ийм зүйл болохоос урьдчилан сэргийлж байсан юм. С.Батцэцэг болон бусад тамирчдыг батлахаа гардаж авсаны дараа Монголын чөлөөт бөхийн удирдах зөвлөлийн хурал болсон байсан. Ингээд С.Батцэцэгийг МАХН-д орсон гэж мэдээд Д.Дагвадорж Шадар сайд Д.Тэрбишдагва руу утасдаж дарамталсан. С.Батцэцэгийн мэдэгдэл хийж байгаа нь үүнтэй холбоотой. Мэдээж ийм дарамт ирж байгаа учир тэр хүүхэд айна шүү дээ. Бид баримтгүйгээр ингэж ярихгүй” гэв.

ЫЙ

МАХН-ын Ёс зүйн хорооны дарга Г.Давааням МАХН-ыг татан буулгахаар шүүхэд хандаад байгаа Г.Баярсайхан нарын талаар тайлбар хийв. Тэрбээр “Г.Баярсайхан нь 2011 оны 3 дугаар сараас МАХН-д зүтгэж эхэлсэн. 2012 онд Нийслэлийн Мэргэжлийн хяналтын газрын даргаар ажиллахад нь туслалцаа үзүүлсэн байна. Гэтэл хотын дарга Э.Бат-Үүл Г.Баярсайхантай хамтран ажиллахаас татгалзаж, ажлаас нь чөлөөлсөн. Гэтэл Г.Баярсайхан үүнд Шадар сайд Д.Тэрбишдагвыг буруутган, өөрийг нь хамгаалсангүй хэмээн тэрсэлдэж эхэлсэн. Одоо түүний "МАХН-ын гишүүд дэмжигчдийн холбоо" гээд байгаа байгууллага нь хуучин МАХН гэсэн нэрийг МАН болгон өөрчлөхөд татан буугдсан байгууллага аж. Гэтэл Г.Баярсайхан нь МАХН-ын лого бүхий албан бичиг барьж яваа бөгөөд тамга нь мөн л МАХН, МАН болон өөрчлөхөд хураагдсан тамга юм байна. Тэгэхээр хуурамч тамга бүхий албан бичиг бариад МАХН-ыг татан буулгана хэмээн ярьж яваа юм. Бид энэ талаар хууль хяналтын байгууллагад хандсан байгаа. Тэр Б.Цэрэндорж гээд байгаа хүн нь нэгэн үе Н.Энхбаярын төлөө үхсэн ч чадна гээд өлсгөлөн зарлаад явж байсан хэрнээ одоо Н.Энхбаяр бол хорт хавдар гээд яриад явж байна. Бид Б.Цэрэндоржийн зүтгэлийг үнэлж тухайн үед таван ханатай иж бүрэн гэр, хүүхдийнх нь 2 жилийн сургалтын төлбөрийг төлж байсан. Ер нь эдгээр хүмүүс өөрсдийн ашиг сонирхол нь бүтэлгүйтсэнээс болж ийнхүү хагарал үүсгэж яваа” гэлээ.

Ы

“МАХН-ын гишүүд дэмжигчдийн холбоо”-ны нөхдийн талаар МАХН-ын зүгээс ийм тайлбарыг хэлж байна.

П.Наран