Монгол Улсаас ОХУ-ын  Кызыл хотод суугаа Ерөнхий консул Д.Ганболд  Хакас улсад айлчилжээ. Айлчлалын үеэр Ерөнхий консул Д.Ганболд  Хакас улсын тэргүүн, Засгийн газрын дарга В.М.Зиминтэй уулзсан байна.  Уулзалт Хакасын Засгийн газрын ордон дахь тэргүүний өрөөнд болж, Ерөнхий консул Д.Ганболд В.М.Зиминд албан ёсоор консулын патентаа өргөн барьжээ.

Ноён Виктор Зимин эртний түүхээрээ гүн гүнзгий холбогдсон хөрш Монгол Улстай нягт харилцаатайг тэмдэглэн, монголын ард түмэнд нэн хүндэтгэлтэй хандаж явдгаа илэрхийлсэн байна.  Уулзалтын үеэр Хакасын тэргүүн соёлын солилцоо хийх, Абакан-Улаанбаатарын шууд нислэг нээх боломжийг судлах, Монголын бараа, бүтээгдэхүүнийг Хакасад борлуулах суваг нээх зэрэг соёл-эдийн засгийн хамтын ажиллагааны талаар нэлээд санал дэвшүүлжээ. Мөн  уламжлалт харилцааг улам өргөжүүлэн батжуулах сонирхолтой байгаагаа нотлохын зэрэгцээ Монголын компани, бизнес эрхлэгчдийг Хакаст зочлохыг урьж, хамтран ажиллах бизнесийн түнштэй болохыг хүссэн байна.

Уулзалтын төгсгөлд Ерөнхий консул Д.Ганболд, түүний саналыг холбогдох яам, газруудад хүргүүлнэ гэдгээ амлажээ.  Мөн Монгол-Хакасын ард түмнүүдийн найрамдал, харилцан ойлголцлыг бэхжүүлэх, Монгол-Хакасын соёл-эдийн засгийн харилцааг шинэ шатанд гаргахад өөрөөс шалтгаалах бүхнийг хийнэ гэдгээ илэрхийлсэн байна.  Ерөнхий консул Д.Ганболд Абакан хотод ажиллах үедээ БНХакасУлсын Шилжилт хөдөлгөөний албаны дарга С.А.Егоровтой монгол иргэдийн асуудлаар, Хакасын ХАҮТ-ын ерөнхийлөгч С.Б.Адамянтай Хакас-Монголын эдийн засаг, бизнесийн харилцааны өнөөгийн байдал, тулгамдаж буй асуудлын талаар тус тус санал солилцжээ.

Н.Энх