Монголын зохиолчдын эвлэлийн шагналт яруу найрагч А.Эрдэнэ-Очир өөрийн төрсөн нутаг Дорноговь аймгийн Улаанбадрах суманд тэмээн жингээр ном тээж хүргэхээр болжээ. Тодруулбал, тэрбээр Улаанбадрах сумын ЕБС-ийн номын сангийн фондыг арвижуулах зорилгоор ном бэлэглэх гэж байгаа ба үүнийгээ тэмээнд тэгнэн, жингийн цуваагаар хүргэхээр болсон байна.

 Энэ нь эрт цагаас Монголчууд ном, судрыг тэмээн жингээр тээдэг байсан уламжлалыг сэргээх, хүүхэд багачуудад таниулах зорилготой аж. Яруу найрагч сумынхаа Ерөнхий боловсролын сургуулийн номын санд 3000 орчим ном бэлэглэх төлөвлөгөөтэй байгаа ба эдгээр ном, үүнийг тээх 18 модон авдар болон жингийн есөн цагаан тэмээ бэлэн болоод байгаа юм байна.

Харин тэдний жин тээж хүргэх нутаг орчимд шүлхий өвчин гарч, хорио цээрийн дэглэм тогтоосноос уг ажил хойшлогдоод буй аж. Энэхүү үйл ажиллагааг ССАЖЯ, Дорноговь аймгийн удирдлагууд, зохиолчид дэмжиж байгаа ба жингийн цуваагаар хүргэх номыг бүрдүүлэхэд яруу найрагчийн өөрийн уран бүтээл, цуглуулгаас гадна хувь хүн, аж ахуй нэгж байгууллага зэрэг олон дэмжигчид хувь нэмрээ оруулжээ.

Б.Буд