Татвар төлөгчид, телевиз үзэгчдийн мөнгө юунд зориулагдаж хаагуур яваад байгааг шалгах цаг болсныг төр сэхээрсэн бололтой. Олон нийтийн гэх болсон цагаасаа М.Наранбаатар нарын хэдхэн хүний гарт хяналтгүй шахам явж ирсэн олон нийтийн телевизийн хөрөнгө мөнгөний асуудал тийм ч цэвэр биш байх гэх хардлага бий болоод байна. Телевиз дээр нь болсон захирлаа огцруулах маргаан сөргөлдөөнөөр хөрөнгө мөнгө идэж уудгаа ил шулуун дуудалцсаныг хуулийн байгууллага болоод төр анхаарахгүй орхиж болохгүй нөхцөл байдал бий болсон бололтой.  Жилдээ 10 тэрбум төгрөгийн хөрөнгөө хаядаг төр энэ байгууллагынхаа шүүсийг шахаж ил далд мөнгө завших зүйл байвал таслан зогсоох цаг болсон гэж олон нийт, үзэгчид нь хэлсээр байгаа. Гэхдээ энэ шалгалт нь нэвтрүүлэг бүтээлээ хийгээд бор зүрхээрээ зүтгэж яваа уран бүтээлчдийг хэлмэгдүүлээд ард нь сууж байгаа акулууд, дарга нарыг нь сугалж үлдээсэн ажил болох вий дээ гэсэн болгоомжлолыг ч иргэд хэлж байна. Ямартай ч МҮОНТ-д ирэх даваа гарагаас шалгалт оруулах сураг дуулдлаа.

1

Үнэн худлыг хэлж мэдэхгүй ч шалгалт орох сургаар уран бүтэлчид сандарч эхэллээ гэж мэдээллээд эхэлснийг харахад шалгалтын үзүүрийг өөр зүгт эргүүлэх гэсэн хэсэг бүлгийн санаа ч цухалзаад байх шиг. Үнэхээр их мөнгөний асуудал байгаа юм болов уу даа. Уран бүтээлчдээс шалгалтын сургаар хил давахаар зэхэж байна гэсэн сүржин мэдээлэл ч харагдлаа. Тэгвэл тамга дарж, мөнгө барьж, зохицуулж байдаг дарга нар нь яах юм, сансарт нисэх юм болов уу даа гэсэн асуулт тавих хүмүүс ч байна. Юутай ч энэ шалгалтаас МҮОНТ-д салхи орж, энэ том байгууллагын дотор нь юу болоод байдаг нь олон нийтийн өмнө ил болж магадгүй гэсэн хүлээлт нийгэмд байна.

1

Б.Галт