“Мал эмнэлэг, үржлийн ажил үйлчилгээ эрхэлдэг аж ахуйн нэгжүүдийн стандартын хэрэгжилтийг шалган, сум, дүүргийн мал эмнэлэг, үржлийн ажил үйлчилгээний нэгжийн үйл ажиллагаанд МХЕГ-аас үнэлэлт дүгнэлт өгчээ.

Стандартын түвшин тогтоох үзлэгт 795 аж ахуй нэгж буюу улсын хэмжээнд үйл ажиллагаа явуулдаг нийт байгууллагын 89.9 хувь нь хамрагдсан байна. Шалгалтаар 90.8 хувь нь дуудлага үйлчилгээний унаа, тээврийн хэрэгсэлтэй, малын эмч нарын 89.4 нь мал эмчлэх итгэмжлэлтэй бөгөөд таван жил тутам сургалтанд хамрагдаж итгэмжлэл авдаг ч  22.6 хувь нь зориулалтын байргүй байгаа аж.

Шалгалтад хамрагдсан аж ахуйн нэгжүүдийн 42.9 хувь нь оношлогоо, шинжилгээ, мал эмнэлэг ариун цэврийн лабораторийн өрөөгүй бол 48.6 нь мал, малын гаралтай бүтээгдэхүүний гарц, чанарыг тодорхойлох багаж хэрэгсэлгүй. Аж ахуйн нэгжүүд 30.6 хувь малын гоц халдварт, халдварт, халдваргүй болон паразит өвчний гаралт, тархалтын талаар эпидемиологийн зураг, судалгаагүй, Малын өвчний онош, малын гаралтай түүхий эдийг шаардлагатай үед лабораторийн шинжилгээгээр баталгаажуулах ажлыг 46.8 хувь нь хийдэггүй байна. Одоогийн байдлаар сумын нэгжүүдэд зөвхөн мал, амьтны гаралтай түүхий эд, бүтээгдэхүүнд мэдрэхүй, өндгөнд овоскопын шинжилгээ хийх боломжтой. Харин бусад шинжилгээг хийхэд багаж төхөөрөмжийн болон лабораторийн шинжилгээний арга зүй, онолын мэдлэг нь хүрэлцдэггүй байна.

Нийт аж ахуйн нэгжүүдийн 65.9 хувь нь нийгмийн эрүүл мэндийг хамгаалах, хүнсний аюулгүй байдлыг хангах талаар хуулиар хүлээсэн үүрэг, хариуцлагаа хангалтгүй хэрэгжүүлж, мал эмнэлгийн үйлчилгээний чанар хүртээмж хэрэглэгчдийн шаардлагыг төдийлөн хангаж чаддаггүй. Малын шилжилт, хөдөлгөөнийг бүрэн хяналтандаа авах, бүртгэл хөтлөх ажил хийгдэхгүй орхигддог.  Малын шилжилт хөдөлгөөн, халдварт өвчний голомттой газрын малыг мал эмнэлгийн урьдчилан сэргийлэх арга хэмжээнд бүрэн хамруулаагүй зэргээс шалтгаалан  халдварт өвчний гаралт, тархалтад тавих хяналт суларч халдварт  өвчин гарах эрсдэл өндөр байгааг харуулж байна.

Б.Буд