Чингэлтэй дүүргийн 4-р хорооны нутаг дэвсгэрт байрлах “Толла” хүнсний дэлгүүрт өнгөрсөн есдүгээр сарын 18-ны лхагва гаригийн орой зэвсэглэж, баг өмссөн этгээд халдан, хоёр ч удаа хий буудаж орлогынх нь мөнгийг дээрэмдэхийг завдсан хэрэг гарсан.   Уг хэргийг 33 настай, эрүүгийн цагдаагийн гуравдугаар хэлтсийн төлөөлөгч, цагдаагийн ахмад цолтой Ч.Эрдэнэжаргал гэгч үйлдсэн нь олныг цочирдуулсан билээ.

Харин түүнд холбогдох хэргийг өнгөрсөн даваа гаригт Чингэлтэй дүүргийн шүүхэд шилжүүлсэн байна.

Түүний хэргийг Улсын прокурорын дэргэдэх Мөрдөн байцаах албанд шалгаж, удаа дараагийн үйлдлээр дээрмийн хэрэг үйлдсэнийг тогтоожээ. Тиймээс түүнд Эрүүгийн хуулийн тусгай ангийн 147-д зааснаар хэрэг үүсгэн, шүүхээр болоод байгаа юм. Тус зүйл ангид бусдын эд хөрөнгийг авах зорилгоор амь биеднь аюултайгаар хүч хэрэглэж буюу хүч хэрэглэхээр заналхийлж довтолсон хэмээн заасан байдаг аж. Хэрвээ гэм буруутай нь тогтоогдвол 3-5 жилийн хорих ялаар шийтгүүлнэ.

Б.Одон