Даваа гариг бүрийн 15.00 цагт зохиогддог “Бүтээн байгуулалтын цаг” өнөөдөр Сонгинохайрхан дүүргийн нэгдүгээр хороо, Баянголын аманд баригдаж буй Буман Өлзий орон сууцны хороололд боллоо.

5

“Бүтээн байгуулалтын цаг”-т Засгийн газрын тэргүүн Н.Алтанхуяг, БХБЯ-ны Төрийн нарийн бичгийн дарга Р.Эрдэнэбүрэн,  Нийслэлийн Засаг даргын Зам тээвэр, дэд бүтцийн асуудал хариуцсан орлогч Н.Гантөмөр, “Буман Өлзий” хорооллын гүйцэтгэгч “Солонго Лайн” ХХК-ийн удирдлагууд  оролцлоо.

5

Уулзалтын эхэнд БХБЯ-ны Төрийн нарийн бичгийн дарга Р.Эрдэнэбүрэн Барилга хот байгуулалтын яамны “Дэд бүтэц” төслийн хүрээнд Буянт-Ухаа орон сууцны хороололд баригдаж буй инженерийн хангамжийн шугам сүлжээний барилга байгууламжийн ажлыг танилцуулсан.

5

Үүний дараа Баянголын аманд 45 га газарт орон сууцны хороолол барих хэсэгчилсэн төлөвлөгөөний ажил хэрхэн урагшилж байгааг танилцуулсан. Баянголын аманд 18 мянга гаруй өрхийн 70 мянга гаруй хүн амьдрахаар тооцсон бөгөөд “Дэд бүтэц” төслөөс 10кВ-ын ХБ иж бүрдэл, 2*400кВА чадалтай ТП 33 ширхэгийг барих, 59.9 км урт 10кВ-ын кабель шугам, 10 ширхэг дулаан дамжуулах шугам сүлжээний ажлыг хийж гүйцэтгэж байгаа гэв.  Үүнээс “Цацрах цог” компани цахилгаан хангамжийн байгууламжийг бүрэн хийж гүйцэтгэсэн гэж танилцуулав.

5

Танилцуулгын дараа “Солонго Лайн” компанийнхан хийж гүйцэтгэж буй ажлаа тайлагнасан. Тус компани нийт 20 га газарт бүтээн байгуулалтын ажил хийж, нийт 5000 айлын орон сууц ашиглалтад оруулах аж. Тус компанийн “Буман Өлзий” хороолол нь одоогийн байдлаар 500 гаруй айлын орон сууцыг хийж гүйцэтгэсэн бөгөөд ирэх 2014 оны гуравдугаар сард ашиглалтад орох юм байна. Мөн энэ үеэр тус компанийнхан шинээр ашиглалтад орж байгаа барилгаа танилцуулсан юм.

5

Хамгийн сүүлд нь “Цацрах Цог” компанийн хийж гүйцэтгэсэн цахилгаан хангамжийн станцуудыг очиж үзсэн. Энэ үеэр тус ажлыг хийж гүйцэтгэсэн компанийн ажилчид үлдэгдэл цалин хөлсөө аваагүй байгаа гэдгээ Ерөнхий сайдад дуулгаж амжсан. Тэрбээр яагаад хийж гүйцэтгэсэн ажлынхаа хөлсийг аваагүй байгаагийн учрыг БХБЯ-ны Төрийн нарийн бичгийн дарга Р.Эрдэнэбүрэнгээс тодруулахад “Улсын комисс хүлээж аваагүй байгаа” хэмээн учирлав. Үүний хариуд Ерөнхий сайд “Энэ бол орчин үеийн хамгийн сонгодог хүнд суртал байна. Асуудлыг даруй шийд” хэмээн үүрэгдсэнээр өнөөдрийн “Бүтээн байгуулалтын цаг” өндөрлөлөө.

П.Наран