Хангарьд ордны 14 давхарт Хөгжлийн бэрхшээлтэй иргэдэд зориулсан нийтийн тээврийн үйлчилгээний хүртээмж, цаашид авч хэрэгжүүлэх арга хэмжээний талаар ярилцах уулзалт болов. Хүн амын хөгжил, нийгмийн хамгааллын яам, нийслэлийн Засаг даргын Тамгын газрын хамтран зохион байгуулж буй уулзалтад таягаа тулсан, тэргэнцэртэй, нэгнээрээ хөтлүүлсэн хөгжлийн бэрхшээлтэй иргэд иржээ. Шийдвэр гаргагчидтай уулзаж, үгээ хэлэх боломж гарсан учраас зорьж ирсэн нь тэр. Гэвч тэдний зорин байж ирсэн уулзалт хүссэн хэмжээнд нь болсонгүй.

..

Нийслэлийн Засаг даргын Тамгын газар хамтарч буй нэрнээс цааш хэтэрсэнгүй. Учир нь Э.Бат-Үүлийн багийг төлөөлж ирсэн түүний орлогч Ц.Буяндалай хаана, юунд сууж байгаа мэдэхгүй байгаа бололтой. Уулзалтын эхэнд түүнийг хөгжлийн бэрхшээлтэй иргэдийн үндэсний чуулганаас хойш хийж хэрэгжүүлсэн арга хэмжээний талаар мэдээлэл хийнэ гэж танилцуулсан ч мань даргад хэлэх үг байсангүй. “Хөгжлийн бэрхшээлтэй иргэдийн талаар хамтран ажиллах хандлага сайжирсан” гэх учир битүүлэг бөөрөнхийллөөс өөр тайлбар тайлан өгсөнгүй. Чуулганаас хойш юу ч хийгээгүй учраас хэлэх үг олдоогүй ч байж болох. Хэлсэн үг нь албаны хүний гэх итгэлийг төрүүлж чадаагүйтэй адил түүнд хотын орлогчийн намба байсангүй. Албан ёсны уулзалтад оролцож байгаа орлогч дарга дахин дахин орж гаран, утсаар ярьж тогтвортой сууж чадахгүй байсан нь тааламжтай харагдсангүй. Товчхондоо энэ уулзалтыг зорьж ирсэн хөгжлийн бэрхшээлтэй иргэдийг тэрбээр үл тоомсорлов. Хотын даргын Хөдөлмөр эрхлэлт, нийгмийн хамгааллын асуудал хариуцсан орлогч ийн паанагтаж эхэлсэн уулзалтад хотынхон үнэхээр бэлтгэлгүй байв. Ядаж л хүний бэлтгэж ирсэн илтгэлийг дүрсээр харуулах тоног төхөөрөмж нь ажиллахгүй, нэг танхимаас нөгөө рүү шилжих зэргээр ач холбогдол өгөөгүй нь жижиг зүйлээс харагдах уулзалтын үр дүн харагдсангүй.

.

Нийслэлд нэг өдөрт 1100 тээврийн хэрэгсэл үйлчилгээ үзүүлдэг ч ганц нь ч хөгжлийн бэрхшээлтэй иргэдэд зориулагдаагүй. Гэтэл Улаанбаатарт 18 мянга гаруй тулгуур эрхтний бэрхшээлтэй хүн бий. Ийм төрсөн заяандаа гомд гэсэн мэт тэднийг хаясан ч асуудал болгон тавьж байгаагаараа чухалд тооцогдох уулзалт байв. Гэвч Ц.Буяндалайгаас эхлээд албаны хүн гэж нэрлэсэн нөхөд хариуцлагатай байж чадаагүйгээс гадна тэдний үгийг ч сонссонгүй. Хөгжлийн бэрхшээлтэй иргэдийн асуудлыг ярьсан уулзалт, хэлэлцүүлэг өчнөөн болдог ч нүдэнд харагдах ажил өнөөдрийг хүртэл хийгдээгүй нь энэ мэт урагшгүй албатаас болдог байж  ч болох. Өөрөө хэлэх үггүй бол ядаж өрөөлийн үгийг тэвчээртэй сонсох чадвартай байх нь харилцааны энгийн дүрэм гэдгийг сануулах нь илүүц биш бололтой.

.

Хотын дарга аа, таны албатуудын ийм байдал нэг биш удаа харагдсан. Тойрон хүрээлэл чинь хариуцсан ажлаа мэдэхгүй байна уу эсвэл хөгжлийн бэрхшээлтэй учраас тэднийг үл тоомсорлов уу, орлогчоосоо тодруулахад илүүдэхгүй л асуулт.

.

В.Хэрлэн