Монгол Улсын Шадар сайд Т.Доржханд АНУ-д хийж буй албан ажлын хүрээнд Олон улсын валютын сан (IMF), Дэлхийн банк (WB)-наас жил бүр зохион байгуулдаг “Spring Meetings 2025” буюу Дэлхийн Эдийн засагчдын хаврын чуулга уулзалтад оролцож яриа хэлэлцээр амжилттай хийж байна.

Айлчлалын хүрээнд Шадар сайд Т.Доржханд дараах төрийн болон хувийн хэвшлийн байгууллагуудын удирдлагуудтай хоёр талын уулзалт хийв.

Үүнд:

• АНУ-ын Төрийн нарийн бичгийн даргын эдийн засгийн өсөлт, эрчим хүч, байгаль орчны асуудал хариуцсан орлогч Томас Э. Лерстен (Thomas E. Lersten)

• Бахрейны Сангийн сайд, Үндэсний эдийн засгийн сайд ноён Шейх Салман бин Халифа Аль Халифа,

• АНУ-ын Цөмийн эрчим хүчний хүрээлэнгийн ерөнхийлөгч, гүйцэтгэх захирал хатагтай Мариа Корсник (Maria Korsnick),

• “The Climate Reality Project” төслийн захирал Мишел Колангес (Michelle Colanges),

• Дэлхийн хөрөнгө оруулалтын салбарын нэр хүндтэй төлөөлөгч, “The Carlyle Group”-ийн хамтран үүсгэн байгуулагч ноён Дэвид Рубенштейн (David Rubenstein),

• Европын Хөрөнгө Оруулалтын Банкны дэд ерөнхийлөгч Томас Эстрөс (Thomas Östros) болон АНУ, НҮБ дахь төлөөлөгч Маркус Берндт (Markus Berndt),

• АНУ-ын цөмийн эрчим хүчний компанийн төлөөлөгч, АНУ-ын өмнөх засаг захиргаанд ажиллаж байсан ноён Питер Уатсон (Peter Watson) нар багтсан юм.

Уулзалтын үеэр Шадар сайд Т.Доржханд Монгол Улсын улс төр, эдийн засгийн нөхцөл байдал, хөрөнгө оруулалтын бодлогын талаар танилцуулж, нээлттэй зах зээл, тогтвортой хөгжил, олон улсын хамтын ажиллагааг бэхжүүлэх талаар Монгол Улсын баримталж буй бодлогыг онцлон тэмдэглэлээ.

Түүнчлэн Монгол Улсад хөрөнгө оруулалт хийх, эрчим хүч, байгаль орчин, санхүүгийн хамтын ажиллагааг өргөжүүлэх чиглэлээр талууд тодорхой санал, санаачилга солилцож, үр дүнтэй хэлэлцээ хийв.

Энэхүү албан айлчлал нь Монгол Улс, АНУ болон олон улсын түнш орнуудын харилцааг шинэ шатанд гаргаж, эдийн засгийн хамтын ажиллагааг өргөжүүлэх, хөрөнгө оруулалтын боломжийг нэмэгдүүлэхэд чухал түлхэц болно гэж талууд үзэж байна.