АНУ, БНХАУ-ын худалдааны дайн улам даамжирч байна. АНУ-ын Ерөнхийлөгч Дональд Трамп БНХАУ-ын бараа бүтээгдэхүүнд ногдуулах импортын татварын 145 хувьд хүргэхээ зарлалаа.

Дональд Трамп БНХАУ-д ногдуулах нэмэлт тарифаа 145-д хүргэхээ зарласан нь  олон улсын анхаарлыг татаж байна. Учир нь дэлхийн хоёр том эдийн засагтай орны зөрчил худалдааны дайнаас хальж, харилцан “де факто” хориг тавилцаж буй асуудал болох шинж ажиглагдаж байна гэж шинжээчид дүгнэж байна. Дональд Трампын худалдааны бодлого, хоёр улсын худалдааны урсгалыг хязгаарлаж, нийлүүлэлтийн сүлжээнд саад учруулж буй. Харилцан ногдуулж буй импортын өндөр татвар нь зөвхөн хоёр улсын эдийн засагт бус дэлхийн эдийн засгийн өсөлтийг хязгаарлах юм. Учир нь Дональд Трамп анхны бүрэн эрхийн хугацаандаа БНХАУ-ын бараа бүтээгдэхүүнд 20 хүртэлх хувийн татвар ногдуулахад л дэлхийн эдийн засаг 5 их наяд доллараар агшиж байв. 

Дональд Трампын энэ шийдвэрээс хоёр хоногийн өмнө БНХАУ-ын Сангийн яам АНУ-аас импортолж буй бүх бараанд 84 хувийн татвар ногдуулах шийдвэрийг зарласан нь худалдааны дайныг өдөөсөн юм.

Мөн Дональд Трамп ОХУ Украины дайныг зогсоох санаачлагад ахиц гарахгүй бол ОХУ-д  нэмэлт татвар ногдуулна гэж анхааруулсан. Хэрэв дайн ойрын хугацаанд зогсохгүй бол ОХУ ч татварын дарамтад өртөх магадлалтай.