УИХ-ын гишүүн Х.Баттулгын өмгөөлөгч П.Пүрэвбаатараар дамжуулж Төгрөг нуурын орд тойрсон гүтгэлгийн асуудлыг шалгуулахаар ЦЕГ-т хандаж байгаа талаараа мэдээлэл хийлээ.

Өмгөөлөгч П.Пүрэвбаатар: Засгийн газрын хэрэг эрхлэх газрын дарга Н.Учрал, УИХ-ын гишүүн Г.Дамдинням нарт холбогдуулаад бусдыг гүтгэсэн үндэслэлээр ЦЕГ-т өргөдөл гаргаж байна. Монгол Улсын Эрүүгийн хуульд заасан онц хүнд гэмт хэрэгт тооцогдох зүйл заалтаар хүнийг гүтгэж байна. Тодруулбал, 250 сая ам.доллараар Монгол Улсын газар нутгийг зараад, татвараас зайлсхийгээд оффшор бүсэд хөрөнгө байрлуулсан гэсэн утга бүхий мэдээллийг ойрын хэдэн хоног байнга гаргаж байгаа учраас тэрэнтэй нь холбогдуулаад Эрүүгийн хуулийн 13.14-т зааснаар худал мэдээлэл тарааж бусдыг гүтгэсэн гэдэг үндэслэлээр Цагдаагийн байгууллагад УИХ-ын гишүүн Х.Баттулгын бие төлөөлөгч, өмгөөлөгчийн хувиар хувьд өргөдөл гаргаж  байна. Нэр бүхий хүмүүсийн хувьд тодорхой баримтгүй, шалгаж тогтоосон зүйлгүйгээр "507 хуудас материал байна" гэж ярьж байгаа нь үндэслэлгүй гэж үзэж байна.

ЗГХЭГ-ын дарга Н.Учрал өчигдөр "Төгрөг нуурын орд"-той холбоотой асуудлаар мэдээлэл хийсэн. Тэрбээр энэ үеэр "2006 онд Х.Баттулга 90 хувийг, Я.Батсүх 10 хувийг нь эзэмшиж байсан CAMEX ХХК "Төгрөг нуур энержи" компанийг 100 хувь эзэмшдэг. Х.Баттулга өөрийн охин Б.Намуун, төрсөн эгч Х.Цэндбаяр нарт хувьцаагаа шилжүүлэн компаниас компани дамнасан, оффшороос оффшорт үргэлжилсэн хэлхээ холбоо бүхий үндэстэн дамнасан компаниудаар дамжуулан Төгрөг нуурын ордыг 250 сая ам.доллараар зарсан" гэх мэдээллийг өгсөн.

Энэ мэдээлэл угаасаа шинэ ч зүйл биш. 2016 онд анх энэ асуудлыг ярьж гарч ирсэн хүн нь "Хас"-ын Ганхуяг. 2020 онд мөн энэ асуудлыг хөндөж тавьж байсан. Сонгууль дөхөхөөр л ийм мэдээлэл гаргаж байна. 2025 онд гурав дахь удаагаа дахин гаргаж, Засгийн газрын хэмжээнд хүч оруулан ярьж байна. Хамгийн хэцүү зүйл нь Монгол Улсын Эрүүгийн хуульд заасан татвараас зайлсхийсэн, 250 сая ам.доллараар газар нутаг зарсан гэдэг нь өөрөө хүнд гэмт хэрэг юм. Ийм гэмт хэрэгт хүнийг гүтгэн харлуулах нь байж болшгүй зүйл гэж үзээд өргөдөл гаргаж байна.

Хамгийн хэцүү юм нь юу вэ гэхээр Монгол Улсын Эрүүгийн хуульд заасан татвараас зайлсхийж, Төгрөг нуурын ордыг 250 сая ам.доллараар зарсан гэх асуудал нь хүнд гэмт хэрэгт тооцогдох учраас ийм гэмт хэрэгт бусдыг гүтгэж, харлуулах нь байж болохгүй зүйл. Монгол Улсын иргэн хувьцаа эзэмших эрхтэй л дээ. Хувьцаа эзэмшсэн компанитай нь холбоотой 431 хуудас баримтыг архиваас хуулбарлаж авч чадсан. Н.Учралыг баримтуудаас илүүг гаргаж ирсэн гэж бодохгүй байна. CAMEX ХХК нь Монголд байгаа. Б.Норовсамбуу гэдэг хүнийх. Хэрэв татвараас зайлсхийсэн бол тус компани одоо ингээд үйл ажиллагаа явуулах боломж байхгүй л дээ. Тиймээс улс төрийн акц явж байна гэж харж байгаа. Яагаад Х.Баттулга өөрөө гарч ирж мэдээлэл хийх ёстой гэж. Өөрөө энд тэнд тайлбарлаад явна лээ. Хуулийн байгууллагад хандахдаа итгэмжлэгдсэн төлөөлөгч болох надаар дамжуулж байна" гэв.