УИХ-ын гишүүн Дав.Цогтбаатар бол гэмт хэрэгтэн. Бүр тодруулбал албан тушаал, авлигын гэмт хэрэгтэн гэдгийг нь гурван шатны шүүхээс нотолсон. Түүнийг анхан болон давж заалдах шатны шүүхээс болон Улсын дээд шүүхээс гэмт хэрэг үйлдсэн нь хөдөлшгүй нотлох баримтаар тогтоогдсон учраас нийтийн албанд томилогдох эрхийг нь хоёр жилээр хасаж, 20 сая төгрөгөөр торгуулах ял оногдуулсан.  Эрүүгийн хуулийн 22.1-т заасан гэмт хэрэгт 1-5 жилийн хорих ял оноох эсвэл торгуулийн ял оногдуулах заалттай бөгөөд шүүхээс түүнд хөнгөн хэлбэрийн ял оногдуулсан нь торгуулаад, нийтийн албанд ажиллах эрхээ хасуулсан явдал. Гэтэл Улсын дээд шүүхээс шийтгэл тогтоолоо авсан Дав.Цогтбаатар УИХ-ын гишүүний бүрэн эрхээсээ түдгэлзэхгүй байхаар чаргууцалджээ.  Уг нь хуульд зааснаар түүний асуудлыг Төрийн байгуулалтын байнгын хороо авч хэлэлцэх ёстой.

УИХ-ын түвшинд процессын зохицуулалтаар далимдуулан, Дав.Цогтбаатарыг эгүүлэн татахгүй байх дээр тохирсон гэгдээд байгаа юм.

Тэрээр 2016-2022 онд Хөгжлийн банкны хэлтсийн захирлаар ажиллаж байхдаа албан тушаалын байдлаа урвуулан ашигласан хэрэгт буруутгагдаж ял сонссон. Тодруулбал Мондулаан, Газ Импорт, Бэрэн групп-д давуу байдал олгож, Эрүүгийн хуулийн 22.1-т заасан гэмт хэрэг үйлдсэн нь тогтоогдсон байдаг. 

Шүүхийн шийдвэрийг УИХ биелүүлэх үүрэгтэй бөгөөд нийтийн албанд ажиллах эрхээ шүүхээр хязгаарлуулсан хэрэгтнийг үүрлүүлэх газар нь УИХ биш. Товчхондоо иргэдийн амьдралын дүрмийг гэмт хэрэгтэн батлаад, санаачлаад явах нь ёс зүйн хэм хэмжээг уландаа гишгэсэн үйлдэл болно. 

АН-аас УИХ-ын нэгдүгээр тойрог Баянхонгор, Архангай, Өвөрхангай аймгаас 56 мянга орчим иргэний санал авсан Дав.Цогтбаатар УИХ-ын гишүүнээс эргүүлэн татагдах эгзэгтэй байдалд тулж ирсэн.