Дональд Трамп АНУ-ын Ерөнхийлөгчөөр дахин сонгогдсоноос хойш Путинтай хийж буй хоёр дахь удаагийн яриа мягмар гарагийн орой болж өнгөрлөө. Тэд утсаар удаан хугацаанд ярилцсан бөгөөд голчлон Украинд болж буй мөргөлдөөн, гал зогсоох асуудал, хоригдлуудын солилцоо, хоёр улсын харилцааны талаар хэлэлцжээ.

Путин 30 хоногийн турш Украины эрчим хүчний байгууламжууд руу хийх цохилтоо зогсоохыг зөвшөөрөв.

ОХУ-ын Ерөнхийлөгч Владимир Путин болон АНУ-ын Ерөнхийлөгч Дональд Трамп нар Украины эрчим хүчний байгууламжууд руу хийх цохилтоо 30 хоногийн хугацаанд түр зогсоохоор тохиролцлоо. Энэ хугацаанд өргөн хүрээтэй энхийн төлөвлөгөөний яриа хэлэлцээрийг "нэн даруй" эхлүүлэхээр болсон гэж Цагаан ордон мэдэгдэв.

Путин Оросын армид Украины эрчим хүчний байгууламжууд руу цохилт өгөхөө зогсоох тушаал өгсөн гэж Кремлийн мэдэгдэлд дурджээ. Гэвч тэрээр АНУ-ын 30 хоногийн гал зогсоох саналыг бүрэн хүлээн зөвшөөрсөнгүй. Уг саналыг Украины талаас хүлээн зөвшөөрөөд байсан юм. Мөн Путин мөргөлдөөнийг шийдвэрлэх ямар ч тохиролцоонд Украинд үзүүлж буй бүх гадаадын цэргийн болон тагнуулын тусламжийг зогсоох асуудал зайлшгүй орно гэж онцолжээ.

Харин Украины Ерөнхийлөгч Володимир Зеленский Оросын эрчим хүчний байгууламжуудад цохилт өгөхөө зогсоох талаар шийдвэр гаргах эсэх нь тодорхойгүй байна. 2022 онд Орос Украин руу довтолсноос хойш Киев томоохон хөршийнхөө эсрэг дрон, пуужингийн дайралтуудыг зохион байгуулж, Оросын нутаг дэвсгэр дэх эрчим хүчний байгууламжуудыг онилж ирсэн. Москва эдгээр дайралтыг терроризм гэж үздэг бол Украины хувьд энэ нь Оросын эдийн засагт дарамт үзүүлэх арга зам аж.

Цагаан ордон мэдэгдэлдээ:

"Удирдагчид энх тайван руу урагшлах эхний алхам нь эрчим хүчний байгууламжууд руу хийх дайралтыг зогсоох явдал гэдэгт санал нэгдэв. Мөн Хар тэнгист далайн бүсийн эвлэрэл байгуулах, бүрэн хэмжээний гал зогсоох гэрээ болон байнгын энхийн хэлэлцээр хийх техникийн яриа хэлэлцээг нэн даруй эхлүүлэхээр боллоо" гэж дурдсан байна. Тус техникийн яриа хэлэлцээрийг Ойрхи Дорнодод эхлүүлэхээр төлөвлөжээ.

Орос, АНУ харилцаагаа хэвийн болгох сонирхолтой байна.

Кремлийн мэдээлснээр өнөөдрийн утасны ярианы дараа Владимир Путин, Дональд Трамп нар хоёр улсын харилцааг хэвийн болгох "харилцан ашигтай сонирхол" байгааг илэрхийлсэн гэжээ.

Үүнтэй холбоотойгоор хоёр улс хамтын ажиллагаагаа өргөжүүлж болох олон чиглэлийг хэлэлцсэн бөгөөд “эдийн засаг, эрчим хүчний салбарт харилцан ашигтай хамтын ажиллагааг хөгжүүлэх хэд хэдэн санааг ярилцсан” гэж Кремль нэмж мэдээлсэн байна.

Украин-Оросын олзны цэргүүдийн солилцоо маргааш явагдана

Путин Трамптай утсаар ярилцах үеэрээ Орос, Украины хооронд олзны цэргүүдийн солилцоог маргааш явуулна гэж мэдэгджээ.

Энэхүү солилцоогоор хоёр талаас нийт 175 хүн чөлөөлөгдөх аж. Мөн Кремлийн мэдэгдэлд "Оросын эмнэлгүүдэд эмчлүүлж буй 23 хүнд шархадсан Украин цэргийг сайн санааны илэрхийлэл болгож Украины талд шилжүүлэн өгөх болно" гэж онцолжээ.