Өнгөрсөн оны 11-р сард Ховд аймгийн Мянгад сумын нутагт орших Халзан Бүрэгтэй ордод газрын ховор элементийн ашиглалтын тусгай зөвшөөрөл эзэмшигч “Монголиан Нэшнл Рийр Ийрт Корп” ХХК-ийн үйл ажиллагааг нутгийн иргэд эсэргүүцэн жагсаал хийснээр тус аймгийн Засаг дарга М.Амарсанаа “Монголиан Нешнл рийр ийрт корп” ХХК-ийн хайгуулын үйл ажиллагааг зогсоосон тухай захирамж гаргаж байсан. Харин өнгөрсөн оны төгсгөлд Ховд аймгийн засаг дарга М.Амарсанаа Халзан Бүрэгтэйн ордын “Газрын ховор элемент”-ийг эдийн засгийн эргэлтэд оруулах Засгийн газрын бодлогын чиг үүргийг орон нутагт хэрэгжүүлнэ гэх утгатай мэдээлэл хийж байсан билээ. Засгийн газрын 2024-2028 онд баримтлах бодлогын 3.3.1.7-д “Газрын ховор элемент боловсруулах үйлдвэрийн төслүүдийг бодлогоор дэмжинэ” гэж мэдэгдсэний дагуу Аймгийн засаг дарга тус төслийн үйл ажиллагааг зогсоосон шийдвэрээ цуцалсан.

Хамгийн сүүлийн мэдээллээр Ховд аймгийн засаг дарга Халзан Бүрэгтэй төслийн оролцогч талууд болон нутгийн иргэд, төрийн бус байгууллагууд оролцсон олон талт ажлын хэсэг байгуулсан байна. Энэхүү ажлын хэсгийн зорилго нь Халзан Бүрэгтэй төслийн оролцогч талуудыг холбох, төслийг олон нийтэд танилцуулах, мэдээллийг цаг тухайд нь хүргэж, нутгийн иргэдтэй ойлголцох боломж бүрдэж байгаа бөгөөд энэ нь өнөөдрийн уул уурхайн салбарын хувьд сайн жишиг болжээ. Уул уурхайн эдийн засагтай улс орон байж, орон нутгийн иргэд болон аж ахуйн нэгжүүдийн хооронд үл ойлголцол үүсч, эдийн засагт ихээхэн үр өгөөжтэй төслүүд зогсонги байдалд орсон нь өнөөдрийн гашуун үнэн. Ийм үед зөвшилцлийн хэлбэр болох ажлын хэсэг байгуулж иргэд олон нийт болон хувийн хэвшлүүд уул уурхайн төслийн талаар санал, бодлоо илэрхийлэх ойлголцох боломжийг оролцогч талуудад өргөн хүрээнд олгохыг зорьж байгаа нь шинэ жишиг төдийгүй эдийн засагт хувь нэмрээ оруулах санаачлага гэж хэлж болно. Халзан Бүрэгтэй төслийн хүрээнд компанийн зүгээс төсөл хэрэгжих сумандаа Мэдээллийн төв нээн тогтмол ажиллуулж байгаа тухай өмнө нь мэдээлсэн. Аймгийн засаг даргын шийдвэрээр байгуулагдсан олон талт ажлын хэсэг Халзан Бүрэгтэй төсөл  хэрхэн хэрэгжих, ямар үр дүнд хүрэх талаар аж ахуйн нэгжийн зүгээс мэдээллээ иргэдэд хүргэх, орон нутгийн иргэд байгаль орчинд нөлөөлөх нөлөөлөл болон эдийн засгийн үр өгөөжийн талаар мэдээлэл авч, санал бодлоо илэрхийлэх боломжийг олгож байгаа давуу талтай. Ажлын хэсэгт орсон талуудын төлөөлөлд газрын ховор элементийн тухай тодорхой мэдээлэл олгох, бодит мэдээллийг нутгийн иргэдэд хүргэх сургалтыг Нийслэлд зохион байгуулж байгаа.

Монгол Улсын хэмжээнд газрын ховор элементийн ислийн 3.1 сая тонн нөөц бий. Энэ ашигт малтмалын нөөцөөрөө бид Дэлхийд эхний 15-рт эрэмблэгддэг. Харин олборлолтын үйл ажиллагаа эхэлбэл манай улс эдийн засгаа тэлэх бүрэн боломжтой бөгөөд Засгийн газраас санаачлан УИХ-аар батлуулсан Үндэсний баялгийн сангийн орлогод бодит орлого оруулах стратегийн ач холбогдолтой юм.