Анхан шатны шүүхээс 2.6 жилийн хорих ял авсан Эрүүл мэндийн яамны Эрүүл мэндийн хөгжлийн төвийн Эс, эд эрхтэн шилжүүлэн суулгах үйл ажиллагааг зохицуулах албаны дарга асан П.Батчулуунд холбогдох давж заалдах шатны шүүх хурал өнөөдөр /2025.03.13/ Нийслэлийн Эрүүгийн хэргийн анхан шатны шүүхэд болно. 

Тэрээр анхан шатны шүүхийн шийдвэрийг эс зөвшөөрч, давж заалдах шатны шүүхэд гомдол гаргасан байдаг. 

П.Батчулуун давж заалдах гомдолдоо түүнд оноосон ялыг хэрэгсэхгүй болгож өгөхийг дурджээ. 

П.Батчулууныг Эрүүл мэндийн яамны албаны даргаар ажиллаж байхдаа 2023 оны наймдугаар сарын 5-6-нд шилжих шөнө БГД-ийн 14-дүгээр хороо, гуравдугаар хорооллын замд зам тээврийн осолд орж, ГССҮТ-д хүргэгдэн ирж хагалгаанд орж, улмаар тархины үхэлтэй болохыг тодорхойлсон С.А-ийн ар гэрийн хүмүүсээс элэг, бөөр, түүний эргэн тойронд байгаа судсыг авах талаар зөвшөөрөл авсан боловч С.А-ийн биеэс шөрмөс, түүний бэхлэгдэх хэсэг буюу толгойн шөрмөсийг тойг яс, шаант ясны бэхлэгдэх хэсгийн хамт, саран жийргэвч шөрмөс, semimembronosus шөрмөсийг шаант ясны дээд булуутай хамт, хоёр дунд чөмгөний доод булуу, archillis anterior шөрмөс зэрэг хүний доод мөчдийн эд, хүний эрхтэн болох цөсний хүүдий зэргийг авах талаар тайлбарлан хэлээгүй, бодит байдлыг нуун дарагдуулж, хууран мэхэлж авсан хэрэгт яллагдагчаар татаж, анхан шатны шүүхээс 2.6 жилийн хорих ял авсан байдаг.