Төрсөн ах Херо Б.Баатарынхаа улс төрийн зорилготой нэвтрүүлэгт хэдэнтээ үзэгдсэнийг эс тооцвол хэвлэлийнхэнд хаалттай Монгол Улсын Ерөнхий сайд Өдрийн сонин-д хаврын чуулганы босгон дээр ярилцлага өгсөн нь хэдэн өдөр Монголчуудын ярианы сэдэв болж буй. Түүний энэ цаг үед Өдрийн сонинд ярилцлага өгсөн нь ч учиртай. Ирэх долоо хоногт /2025.03.17/-нд хаврын чуулган эхэлнэ. Энэ хаврын чуулганаар стратегийн ордуудын 34 хувийг төрийн мэдэлд авах асуудал анхааралд буй мега сэдэв.

Л.Оюун-Эрдэнийн улстөрийн нүүдэл УИХ-ын дарга Д.Амарбаясгалан...

Үндэсний баялгийн сангийн өгөөж гэж оны өмнөхөн иргэн бүрийн хуримтлалын дансанд 135 мянган төгрөг хийсэн нь Л.Оюун-Эрдэнийн иргэдээр хамгаалалт үүсгэх эвээс болсон байдаг. Тиймдээ ч Засгийн газрын өрдөж буй галд иргэд цучил нэмж, үндэсний томоохон компаниудын эсрэг зогсож, байгалийн баялаг бүх ард түмний өмч гэх Үндсэн хуулийн заалтыг бамбай болгон нийгмийн сүлжээгээр зохион байгуулалттайгаар нүдэж эхэлсэн. Стратегийн ордуудад төрийн эзэмшлийг тогтоож, үндэсний баялгийн санд хуримтлал бий болгох хуулийн заалтыг хэн бэ гуай нь ч байсан гар өргөөд дэмжинэ. Гол нь хуулиар далайлгаж, төрийн нэрээр сүрдүүлж, хувийн хэвшлээ тонгорч бас тонож болохгүй гэдэг байр суурийг илэрхийлээд байгаа юм. MCS-д Ухаа худаг хулгайн замаар орсон гэж Ерөнхий сайд итгэдэг. Тиймдээ ч БНХАУ-тай хил холболтын төмөр замын гэрээг үзэглэсэн цагаас Энержи Ресурс ХХК-руу довтолж буй. Л.Оюун-Эрдэнэд амаргүй хаврын чуулган байх нь... Ж.Оджаргалыг цээжээрээ хамгаалах гишүүд төрийн ордонд цөөнгүй гүйлдэж байгаа. Агтны хариу жилдээ, аяганы хариу өдөртөө. Сонгуулиар MCS-ээс авсан хандивын мөнгөнийхөө хариуг гишүүд одоо барина. Харин Ерөнхий сайд хуудуутай аргаар Энержи Ресурсд үлдсэн Ухаа худгийн асуудлыг хэрхэхийг УИХ-ын дарга  Д.Амарбаясгалан руу шидэв. Үндэсний баялгийн сангийн тухай хуулийн төсөл дээр Д.Амарбаясгалан ЗГХЭГ-ын дарга байхдаа ажлын хэсгийн ахлагчаар ажиллаж байсныг ч сануулав. Өөрөөр хэлбэл манлайлан оролцож батлуулсан хуулиа хэрэгжүүлэх эсэх дээр Д.Амарбаясгалан унаж байгаа бололтой юм. Олон улсын хөрөнгийн бирж дээр хувьцаагаа гаргасан компаниар оролдохоос айхгүй байгаа бөгөөд Ухаа худаг хэрхэн ямар арга замаар MCS-д үлдсэн бүх баримт бий. Тиймээс УИХ-дээр нээлттэй хэлэлцэх нь зүйтэй гэдэг байр сууриа хадгалав.

Эрдэнэтийг төрд авсан нь буцалтгүй, харин үлдсэн төлбөрийг дуусгана

Эрдэнэтийн 49 хувь дээр ч цэг хатгаж, тооцоогоо дуусгах нь тодорхой болжээ. Үндсэн хуулийн цэц Эрдэнэт үйлдвэрт онцгой байдал тогтоосныг үгүйсгэсэн шийдвэр гаргасныг тэрээр эсэргүүцэж буй аж. Өөрөөр хэлбэл цэцийн шийдвэрийг хэрэгсэхгүй, Эрдэнэтийн 49 хувийг төрийн мэдэлд авсан нь хууль ёсных гэв. Харин төлбөр тооцоог дуусгах нь зүйтэй гэж мэдэгдэв. Эрдэнэтийн 49 хувь, Дубайн гэрээнд  буруутгагдаж буй Ч.Сайханбилэгийн АНУ-аас өөрөө ирэхгүй бол чирж авчирна гэнэ.

Х.Баттулгыг өмөөрч, У.Хүрэлсүхэд ам нээсэнгүй...

Үндэсний баялгийн сангаар Х.Баттулгатай дөрөө харшуулах болсоноо ил цагаан харуулсан Ерөнхий сайд Л.Оюун-Эрдэнэ энэ тухай сэтгүүлчийн асуултад бөөрөнхийлөв. Х.Баттулгатай ардчиллын зарчмууд дээр дайсагнаж байсан удаатай гэж өөрийгөө дөвийлгөсөн Ерөнхий сайд Х.Баттулгыг  Ерөнхийлөгч байхад тахимдаж байсан улстөрчид одоо түүний эсрэг бороолж буйд ч хов дуулгаад амжив. Сөрөг хүчний хүчтэй лийдертэй хорших болсон Ерөнхий сайдыг Ерөнхийлөгч У.Хүрэлсүхтэй түнжин муудсан гэх. Харин тэрээр тэдний харилцаа хэвийн бөгөөд улстөрийн муужгай нарын хов бодит байдлаас хамаагүй илүү байдаг юм билээ гэж тайлбарлав. Ерөнхийлөгчтэй холбоотой асуултаас эвтэйхэн бултсан Ерөнхий сайд цаг нь ирэхээр нэг юм дуулгана гэдгээ ч хэлсэн байна. Харин хоёрхон жилийн дараа бүрэн эрх нь дуусгавар болох У.Хүрэлсүх нөлөөгөө хэвээр хадгалахын тулд улстөрийн хэлэлцэлд хэдийнэ орсон гэх.

М.Энхболдыг ч мартсангүй...

Нэгэн цагт улстөрөөс таягдсан М.Энхболдтой хамтран ажиллахаар АНУ-ыг зорьж уулзсанаа ч ярьжээ. М.Энхболдыг Булангийн орнуудын хөрөнгө оруулалтын асуудлаар тусгай үүрэгт элчин сайдаар ажиллуулах урилга хүргүүлсэн байна.

Л.Оюун-Эрдэнийн скандал О.Дөлгөөн...

Ерөнхий сайд Л.Оюун-Эрдэнэ Х.Баттулгатай холбоотой сэтгүүлчийн асуултад өөрийнхөө тухай цуурхалд хариулт хавчуулав. Түүнийг жүжигчин бүсгүйтэй хүний нутагт нууцаар хуримласан гэх мэдээлэл нийгмийн сүлжээний цайны сэдэв болсон. Харин Ерөнхий сайд түүнтэй кофе ч ууж үзээгүй гэдгээ ярилцлагын үеэр ам нээв. Энэ мэтээр Ерөнхий сайд хувийн амьдралаасаа авхуулаад улстөрийн нөхцөл байдал, үндэсний томоохон компаниудын эсрэг зогсох болсон шалтгаан гээд мега төслүүдийн зах зухаас хариулт өгөв.   Хаврын чуулган хаяанд ирлээ. Даанч амаргүй хаврын чуулган болох нь дамжиггүй ээ...