АНУ-ын Ерөнхийлөгч Дональд Трамп Канад болон Мексикийн бараа бүтээгдэхүүнд ногдуулах импортийн татварыг 25 хувь болгон нэмэгдүүлэх шийдвэр гаргасан байдаг. Энэ шийдвэр мягмар гарагаас хэрэгжиж эхэлсэн ч зарим маргааны улмаас түр зогссон байна.

Тодруулбал Канад Мексикийн импортын бараанд ногдуулах тарифын нэмэгдэл ирэх дөрөвдүгээр сарын 2 хүртэл түр зогсоожээ. Харин Дональд Трампын хөрш орнууддаа ногдуулсан гаалийн татвар хоёр хоног хэрэгжиж эхэлсний дараа түр хойшилсон нь хөрөнгийн зах зээлд тогтворгүй байдал үүсгэж байгаа юм. Пүрэв гарагийн байдлаар АНУ-ын хөрөнгийн биржийн тэргүүлэгч индексүүд бүгд буурч, тэргүүлэгч 500 компанийг хянадаг S&P 500 индекс 1.8%-иар буурсан үзүүлэлттэй байна. Учир нь Дональд Трампын гаалийн татварын эсрэг Канадын засгийн газрын шийдвэр аль хэдийн хэрэгжих эхэлсэн. Тиймээс талуудын гадаад худалдаанд харилцан тэнцвэргүй байдал үүсээд байна.

Харин Мексикийн Ерөнхийлөгч Клаудиа Шейнбаум Дональд Трампын татварын нэмэгдлийг хойшлуулж байгаа энэ үйлдэлд талархал илэрхийлсэн бол Канадын Сангийн сайд АНУ-ын бүтээгдэхүүнд хариу болгон ногдуулсан гаалийн татварын хоёр дахь шатны арга хэмжээгээ зогсооно гэж мэдэгдлээ.