Францын Ерөнхийлөгч Эммануэль Макрон цөмийн зэвсгийн хамгаалалтаа өргөжүүлж Европын бусад холбоотон орнуудаа хөтөлбөртөө хамруулах асуудлыг хэлэлцэнэ гэж мэдэгдлээ. Францын Ерөнхийлөгч Эммануэль Макроны мэдэгдэлд дурдсанаар “Орос Украины дайн дахь АНУ-ын байр суурь өөрчлөгдсөн учир Европ байнгын бэлэн байдалд байх ёстой” гэв.

Үүгээр Францын Ерөнхийлөгч Эммануэль Макрон  Европ тив дэх холбоотон орнуудаа цөмийн зэвсгээр хамгаалах бөгөөд Украин улсад ч үргэлжлүүлэн туслахаа мэдэгдсэн юм.  

Францын цөмийн зэвсэг бол бидний бүрэн эрхт байдлыг хамгаалах баталгаа юм. Энэ эрх нь Францын Ерөнхийлөгч, армийн командлагчийн гарт байсаар ирсэн бөгөөд цаашид ч хэвээр байна гэж Эммануэль Макрон хэлсэн байна. Мөн Украины аюулгүй байдал АНУ-д хамааралгүй болж байр сууриа өөрчилсөн нь Европыг "шинэ эринд оруулж буй хэрэг юм” гэж тэрээр үзжээ.

Цаашид Франц улс НАТО болон АНУ-тай харилцах түншлэлийн харилцаагаа хэвээр байлгах ч өөрийн батлан хамгаалах салбарыг өргөжүүлэх, бие даасан байдлыг бэхжүүлэх асуудлаар “их зүйл хийх” шаардлагатай байгааг Эммануэль Макрон онцолжээ.