БНХАУ-ын эрх баригчид энэ онд гадаадын хөрөнгө оруулалт татах чиглэлд эрчимтэй ажиллах нь. Тодруулбал энэ сарын 19-ны өдөр “Гадны хөрөнгө оруулалтыг тогтворжуулах 2025 оны үйл ажиллагааны төлөвлөгөө” баталсанаа зарлаад байна. Энэхүү баримт бичигт, БНХАУ-д үйл ажиллагаа эрхэлж буй гадаадын бизнес эрхлэгчдэд тулгамдаж буй томоохон асуудлуудыг шийдвэрлэхээр зорьжээ.  

Үүнд, БНХАУ-ын засгийн газрын худалдан авалтын стандартыг тодорхой болгох, харилцаа холбоо, эрүүл мэнд, боловсрол, соёлын салбарыг гадаадын хөрөнгө оруулагчдад нээлттэй болгоно гэж заасан байна. Мөн БНХАУ-д “Ноу-Хау” нутагшуулсан гадаадын хөрөнгө оруулагчдад засгийн газраас дэмжлэг үзүүлнэ гэжээ. Энэ төлөвлөгөө нь 2025 онд БНХАУ даяар хэрэгжих бөгөөд гадаадын хөрөнгө оруулагчдын итгэлийн сэргээх, хөрөнгө оруулалтыг нэмэгдүүлэх ёстой хэмээн үзэж байна.

2025 оны 1-р сард БНХАУ-ын гадаадын шууд хөрөнгө оруулалт өнгөрсөн оны мөн үеэс 13.4%-иар буурч, 13.46 тэрбум доллар болсон тухай тус улсын Худалдааны яамнаас мэдээлсэн. Тэгвэл 2024 онд БНХАУ-ын гадаадын шууд хөрөнгө оруулалт 2023 оноос 27.1%-иар буурсан байна.

Тиймээс жил бүр тогтмол буурч буй гадаадын хөрөнгө оруулагчдын итгэлийг дахин сэргээхээр БНХАУ-ын эрхбаригчид ийнхүү хүчин чармайлт гаргаж эхлээд байна.

БНХАУ-ын “Гадны хөрөнгө оруулалтыг тогтворжуулах 2025 оны үйл ажиллагааны төлөвлөгөө”-г зарласан арга хэмжээнд “Alibaba”-ын үүсгэн байгуулагч Жэк Ма, хиймэл оюун ухааны чатбот “DeepSeek”-ийн Лианг Вэнфэн зэрэг бизнесийн “акулууд” оролцжээ.

Сүүлийн жилүүдэд БНХАУ болон АНУ-ын харилцаа хурцдаж,  геополитикийн зөрчил нэмэгдсээр байна. АНУ БНХАУ-ын технологийн компаниудад хориг тавьж, БНХАУ АНУ-ын бараа бүтээгдэхүүнд татвар ногдуулсан нь Дональд Трампын засаглалын үед гүнзгийрч мэдэх төлөвтэй байна. Тиймээс БНХАУ эдийн засгийн тогтвортой байдлаа хангах үүднээс төрийн бодлогоо өөрчилж, гадаадын хөрөнгө оруулагчдад хандах хандлагаа зөөлрүүлж, эдийн засгийн өсөлтөд нэмэгдүүлэх арга хэмжээг шат дараатай хэрэгжүүлэх төлөвлөгөөнд шилжжээ.